മലയാളി ക്രിക്കറ്റ് താരം സഞ്ജു സാംസണെ വാനോളം പുകഴ്ത്തി ഇന്ത്യന്‍ മുന്‍ താരവും സെലക്ടറുമായിരുന്ന സാബാ കരീം. സഞ്ജുവിനെ തനിക്ക് ഇതുവരെ പിടികിട്ടിയിട്ടില്ലെന്നും പക്ഷേ ഏറെ പ്രതിഭയുള്ള താരമാണ് അദ്ദേഹമെന്നും സാബ കരീം പറഞ്ഞു.
സഞ്ജുവിനെ എനിക്ക് ഇതുവരെ പിടികിട്ടിയിട്ടില്ല. അദ്ദേഹം വളരെ നന്നായി കളിക്കുന്നുണ്ട്. പ്രതിഭയുണ്ട്. സഞ്ജുവിന്റെ ബാറ്റിങ് കാണുമ്പോള്‍ എനിക്കു സന്തോഷമുണ്ട്. ക്രീസിലെത്തി ആക്രമിച്ചു കളിക്കാനാണ് ഉദ്ദേശമെന്ന് സഞ്ജു നേരത്തേ വ്യക്തമാക്കിയിരുന്നു. അദ്ദേഹം അതു നടപ്പാക്കി.
ആത്മവിശ്വാസത്തിലായിരുന്ന വിന്‍ഡീസ് ലെഗ് സ്പിന്നറെ സഞ്ജു കൈകാര്യം ചെയ്ത രീതി മനോഹരമാണ്. അതാണു സഞ്ജുവിന്റെ കഴിവ്. അദ്ദേഹത്തിനു തുടര്‍ച്ചയായി അവസരങ്ങള്‍ ലഭിച്ചിട്ടില്ല. പ്രധാന താരങ്ങള്‍ക്കു വിശ്രമം അനുവദിക്കുമ്പോള്‍ മാത്രമാണു സഞ്ജു കളിക്കുന്നത്. അത് അത്ര എളുപ്പമുള്ള കാര്യമല്ല. എങ്കിലും അദ്ദേഹം മുന്നോട്ടുതന്നെയാണു പോകുന്നത്.
സഞ്ജുവിനെ മൂന്നാം നമ്പരില്‍ ബാറ്റിംഗിന് ഇറക്കി. അദ്ദേഹം സന്തോഷവാനായിരുന്നു. നാലാമത് ഇറക്കിയപ്പോള്‍ അര്‍ദ്ധ സെഞ്ച്വറി നേടി. ശരിക്കുമൊരു ടീം മാനായി സഞ്ജു എപ്പോഴും ഇവിടെയുണ്ട്- സാബാ കരീം പറഞ്ഞു.