ഇന്ത്യന്‍ ടീം താരവും കേരള ടീം ക്യാപ്റ്റനുമായ സഞ്ജു സാംസണിനെ വാനോളം പുകഴ്ത്തി രോഹന്‍ കുന്നുമ്മല്‍. യുവതാരങ്ങളെ സഞ്ജു എല്ലായ്പ്പോഴും പിന്തുണയ്ക്കാറുണ്ടെന്നും തങ്ങളെ സംബന്ധിച്ച് സഞ്ജു ദൈവതുല്യനാണെന്നും താരം പറഞ്ഞു.
സഞ്ജു ചേട്ടന്‍ ഞങ്ങള്‍ക്കു ദൈവത്തെപ്പോലെയാണ്. അദ്ദേഹം എല്ലായ്പ്പോഴും ധീരമായ തീരുമാനങ്ങളെടുക്കുകയും ശരിയാണെന്നു തോന്നുന്ന കാര്യങ്ങള്‍ ചെയ്യുകയും ചെയ്യാറുണ്ട്. ഇതു വളരെ അപൂര്‍വ്വമായിട്ടുള്ള കഴിവ് തന്നെയാണ്. ഒരു കളിക്കാരനെന്ന നിലയിലും, വ്യക്തിയെന്ന നിലയിലും ഇതു വളരെ നല്ലൊരു ഗുണമാണ്.
യുവതാരങ്ങളെ സഞ്ജു എല്ലായ്പ്പോഴും പിന്തുണയ്ക്കാറുണ്ട്. എപ്പോള്‍ വേണമെങ്കിലും നമുക്കു അദ്ദേഹത്തെ വിളിക്കാം. അതിനോടു സഞ്ജു പ്രതികരിക്കുകയും ചെയ്യും. ഏതു സമയത്തും അദ്ദേഹത്തെ സമീപിക്കാമെന്നത് ഞങ്ങളെ സംബന്ധിച്ച് ഒരു അനുഗ്രഹം തന്നെയാണ്.
കരിയറില്‍ സഞ്ജു എല്ലായ്പ്പോഴും എന്നെ പിന്തുണച്ചിട്ടുണ്ട്. മറ്റുള്ളവരില്‍ നിന്നും നീ വ്യത്യസ്തനായാണ് കാണപ്പെടുന്നതെന്നു അദ്ദേഹം പറഞ്ഞിരുന്നു. സ്വന്തം ഗെയിം തുടരണമെന്നും ആശങ്കപ്പെടേണ്ട കാര്യമില്ലെന്നും ഉപദേശിച്ചു.
ആ സമയത്തു അഗ്രസീവായ ക്രിക്കറ്റ് കളിച്ചു കൊണ്ടിരുന്ന ഒരേയൊരാള്‍ സഞ്ജു ചേട്ടനായിരുന്നു. ഒരു മാറ്റം കൊണ്ടുവന്നിട്ടുള്ള വ്യക്തിയും അദ്ദേഹമായിരുന്നു. ഇപ്പോള്‍ ഞങ്ങളെല്ലാം അദ്ദേഹത്തെ പിന്തുടരുന്നവരാണ്- രോഹന്‍ പറഞ്ഞു.