ഇന്ത്യയുടെ പ്രധാന ആഭ്യന്തര ടി20 മത്സരമായ സയ്യിദ് മുഷ്താഖ് അലി ട്രോഫി ഇന്ന് ആരംഭിക്കും. മികച്ച ഇന്ത്യൻ കളിക്കാരുടെയും വളർന്നുവരുന്ന യുവപ്രതിഭകളുടെയും ഒരു മിശ്രിതം പല ടീമുകളിലായി മത്സരിക്കും. 2007-ൽ സ്ഥാപിതമായ ടൂർണമെൻ്റ് അതിൻ്റെ 17-ാം പതിപ്പിലേക്ക് കടക്കുകയാണ്. 38 ടീമുകൾ ഈ ടൂർണമെന്റിൽ ഇറങ്ങുന്നുണ്ട്. അഭിഷേക് ശർമ്മയുടെ നേതൃത്വത്തിൽ നിലവിലെ ചാമ്പ്യന്മാരായ പഞ്ചാബ് കഴിഞ്ഞ വർഷം ബറോഡയെ ഫൈനലിൽ തോൽപ്പിച്ച് തങ്ങളുടെ ആദ്യ കിരീടം സ്വന്തമാക്കിയിരുന്നു. സീസണിൽ 10 മത്സരങ്ങളിൽ നിന്ന് രണ്ട് സെഞ്ചുറികളും മൂന്ന് അർധസെഞ്ചുറികളും ഉൾപ്പെടെ 485 റൺസ് നേടിയ അഭിഷേക് ‘പ്ലയർ ഓഫ് ദി സീരീസ്’ ആയി മാറി. അഭിഷേക് ഇപ്പോൾ ഇന്ത്യൻ ടി 20 യിലെ പ്രധാന താരങ്ങളിൽ ഒരാളാണ്.
ഈ വർഷം, 38 ടീമുകളെ അഞ്ച് ഗ്രൂപ്പുകളായി തിരിച്ചിരിക്കുന്നു: എ മുതൽ സി വരെയുള്ള ഗ്രൂപ്പുകളിൽ എട്ട് ടീമുകൾ വീതവും ഡി, ഇ ഗ്രൂപ്പുകളിൽ ഏഴ് ടീമുകൾ വീതവുമാണ്. നിലവിലെ ചാമ്പ്യന്മാരായ പഞ്ചാബ് ബംഗാൾ, മധ്യപ്രദേശ്, ഹൈദരാബാദ്, രാജസ്ഥാൻ, മേഘാലയ, മിസോറാം, ബിഹാർ എന്നിവയ്‌ക്കൊപ്പം ഗ്രൂപ്പ് എയിലാണ്.
സയ്യിദ് മുഷ്താഖ് അലി ട്രോഫിയിൽ, ടീമുകൾ അതത് ഗ്രൂപ്പുകളിൽ റൗണ്ട് റോബിൻ ഫോർമാറ്റിൽ ഏറ്റുമുട്ടും. ഓരോ ഗ്രൂപ്പിലെയും ആദ്യ രണ്ട് ടീമുകൾ നോക്കൗട്ട് ഘട്ടത്തിലേക്ക് മുന്നേറും. അവരിൽ, അഞ്ച് ഗ്രൂപ്പ് ജേതാക്കളും മികച്ച രണ്ടാം സ്ഥാനക്കാരും നേരിട്ട് ക്വാർട്ടർ ഫൈനലിൽ സ്ഥാനങ്ങൾ ഉറപ്പിക്കും. ശേഷിക്കുന്ന നാല് ടീമുകൾ പ്രീ ക്വാർട്ടറിൽ മത്സരിച്ച് ലൈനപ്പ് പൂർത്തിയാക്കും. 2006-07, 2020-21, 2021-22 വർഷങ്ങളിൽ കിരീടം നേടിയ തമിഴ്‌നാട് മത്സര ചരിത്രത്തിലെ ഏറ്റവും വിജയകരമായ ടീമായി തുടരുന്നു.
നിരവധി മാർക്വീ ഇന്ത്യൻ കളിക്കാരെ ഈ സീസണിൽ കാണാൻ സാധിക്കും. കഴിഞ്ഞ വർഷത്തെ രണ്ടാം സ്ഥാനക്കാരായ ബറോഡ, പാണ്ഡ്യ സഹോദരന്മാരായ ഹാർദിക്, ക്രുനാൽ എന്നിവരെ അവരുടെ ടീമിൽ ഇറക്കും. കണങ്കാലിനേറ്റ പരിക്കിൽ നിന്ന് മോചിതനായ മുഹമ്മദ് ഷമി ബംഗാളിനെ പ്രതിനിധീകരിക്കും. മറുവശത്ത്, രണ്ട് ടി20 ഐ സെഞ്ച്വറികൾ വീതമുള്ള ദക്ഷിണാഫ്രിക്കയിൽ മികച്ച പ്രകടനങ്ങൾ കാഴ്ചവെച്ച തിലക് വർമ്മയും സഞ്ജു സാംസണും യഥാക്രമം ഹൈദരാബാദിനെയും കേരളത്തെയും നയിക്കും.
ഷമി, സഞ്ജു തുടങ്ങി താരങ്ങൾ പരസ്പരം ഏറ്റുമുട്ടുന്ന മത്സരമൊക്കെ ആരാധകർ ആവേശത്തോടെയാണ് കാത്തിരിക്കുന്നത്.
