വിജയ് ഹസാരെ ട്രോഫിയിലേക്ക് സഞ്ജു സാംസണെ തിരഞ്ഞെടുക്കാത്തത്തിന് പിന്നാലെ 2025 ലെ ചാമ്പ്യൻസ് ട്രോഫിക്കുള്ള ഇന്ത്യൻ ടീമിൽ ഇടം കണ്ടെത്താൻ ബുദ്ധിമുട്ടിയേക്കുമെന്ന് പറഞ്ഞിരിക്കുകയാണ് ആകാശ് ചോപ്ര. ഋഷഭ് പന്തിനെ മറികടന്ന് ഇന്ത്യൻ ടീമിൽ സ്ഥിരമായി സ്ഥാനത്തിന് സഞ്ജുവിന് അവസരം ഉണ്ടായിരുന്നു എന്നും എന്നാൽ അതിന് സാധിച്ചേക്കില്ലെന്നും ചോപ്ര പറഞ്ഞു.
ഇന്ത്യയുടെ അന്തർ സംസ്ഥാന ഏകദിന ടൂർണമെൻ്റായ വിജയ് ഹസാരെ ട്രോഫി ഡിസംബർ 21 ശനിയാഴ്ച ആരംഭിച്ചു. കേരള ടീമിൽ സാംസണും മുംബൈ ടീമിൽ പ്രത്വി ഷായും ഇടം പിടിച്ചില്ല. തൻ്റെ യൂട്യൂബ് ചാനലായ ‘ആകാശ് ചോപ്ര’യിൽ പങ്കുവെച്ച വീഡിയോയിൽ, സാംസണിൻ്റെയും ഷായുടെയും കേസുകൾ താരതമ്യം ചെയ്യരുതെന്ന് മുൻ ഇന്ത്യൻ ഓപ്പണർ കുറിച്ചു. എന്നിരുന്നാലും, ഇന്ത്യയുടെ ചാമ്പ്യൻസ് ട്രോഫി ടീമിൽ ഇടം നേടാനുള്ള ഗോൾഡൻ ചാൻസ് സഞ്ജു കളഞ്ഞുകുളിച്ചു എന്നാണ് ചോപ്ര പറഞ്ഞത്
“വിജയ് ഹസാരെ ട്രോഫിയിലേക്ക് വന്നാൽ നമുക്ക് സഞ്ജു സാംസണെ കുറിച്ച് സംസാരിക്കാം, കാരണം വിജയ് ഹസാരെ ട്രോഫിയിൽ അദ്ദേഹത്തിൻ്റെ പേര് ഇല്ല, നിങ്ങൾ ചിന്തിക്കുന്നുണ്ടാകും – അവൻ വയനാട്ടിലേക്ക് പോയില്ല, ക്യാമ്പിൽ പങ്കെടുത്തില്ല, അതിനാൽ അവനെ തിരഞ്ഞെടുക്കില്ല എന്ന് കേരളം പറഞ്ഞു. കാലിന് പരിക്കേറ്റതിനാൽ ആണ് സഞ്ജുവിന് ക്യാമ്പ് നഷ്ടമായത് എന്ന് അവനോട് ബന്ധപ്പെട്ട ചിലർ പറഞ്ഞിരുന്നു ”അദ്ദേഹം പറഞ്ഞു.
“എന്നിരുന്നാലും, അവർ അവനെ തിരഞ്ഞെടുത്തിട്ടില്ല. വിജയ് ഹസാരെയെ കളിക്കുന്നത് സഞ്ജുവിന് പ്രധാനമാണ്. ടി20യിൽ മൂന്ന് സെഞ്ച്വറി നേടി തിളങ്ങി നിൽക്കുന്ന അവന് ഏകദിന ടീമിൽ ഇടം പിടിക്കാൻ അവസരം ഉണ്ടായിരുന്നു. ഋഷഭ് പന്ത് ഇതുവരെ ഏകദിന ടീമിൽ സ്ഥിരമായ ഇടം പിടിക്കാത്ത സാഹചര്യത്തിൽ സഞ്ജുവിന് നല്ല അവസരമായിരുന്നു ചാമ്പ്യൻസ് ട്രോഫി. പക്ഷെ വിജയ് ഹസാരെ ട്രോഫിയിൽ ഇടം ഇല്ലാത്ത സ്ഥിതിക്ക് ചാൻസ് കുറവാണ്.”
കഴിഞ്ഞ വർഷത്തെ ഏകദിന ലോകകപ്പിലെ പ്രകടനങ്ങൾ കണക്കിലെടുത്ത് ചാമ്പ്യൻസ് ട്രോഫിക്കുള്ള ഇന്ത്യൻ ടീമിൽ വിക്കറ്റ് കീപ്പർ-ബാറ്ററായി മത്സരിക്കാൻ കെ എൽ രാഹുലുണ്ടാകുമെന്ന് ഉറപ്പാണ്. രണ്ടാം കീപ്പർ-ബാറ്ററുടെ സ്ഥാനത്തേക്ക് പന്തും സാംസണും മത്സരിക്കും.