മുംബൈ വാങ്കഡെ സ്റ്റേഡിയത്തില്‍ ന്യൂസിലന്‍ഡിനെതിരായ മൂന്നാം ടെസ്റ്റിന് മുന്നോടിയായി കളിക്കാര്‍ക്ക് പരിശീലനം നിര്‍ബന്ധമാക്കി ഇന്ത്യന്‍ ടീം മാനേജ്മെന്റ്. നേരത്തെ, ഗൗതം ഗംഭീറിന്റെ നേതൃത്വത്തിലുള്ള ടീം മാനേജ്മെന്റ് കളിക്കാര്‍ക്കായി ഓപ്ഷണല്‍ പരിശീലന സെഷനുകള്‍ നടത്തിയിരുന്നു, സെഷനില്‍ പങ്കെടുക്കണോ വേണ്ടയോ എന്നത് പ്രത്യേക കളിക്കാരന്റെ തീരുമാനമായിരുന്നു. എന്നിരുന്നാലും, പൂനെയില്‍ ന്യൂസിലന്‍ഡിനോട് ഇന്ത്യ തോറ്റത് ടീം മാനേജ്‌മെന്റിനെ കഠിനമായ വഴിക്ക് പോകാന്‍ പ്രേരിപ്പിച്ചതായാണ് വിവരം.
മുംബൈയില്‍ നടക്കുന്ന മൂന്നാം ടെസ്റ്റ് മത്സരത്തിന് മുന്നോടിയായുള്ള പരിശീലന സെഷനില്‍ പങ്കെടുക്കാന്‍ ടീമിലെ എല്ലാ കളിക്കാരോടും ഗൗതം ഗംഭീറിന്റെ നേതൃത്വത്തിലുള്ള ടീം മാനേജ്മെന്റ് ആവശ്യപ്പെട്ടതായി ദി ഇന്ത്യന്‍ എക്സ്പ്രസ് റിപ്പോര്‍ട്ട് ചെയ്യുന്നു. തല്‍ഫലമായി, മത്സരത്തിന് മുന്നോടിയായി മുംബൈയില്‍ ‘ഓപ്ഷണല്‍’ പരിശീലന സെഷന്‍ ഉണ്ടാകില്ല. കൂടാതെ ടീമിലെ 16 കളിക്കാരും മാച്ച് പരിശീലനത്തിന്റെ രണ്ട് സെഷനുകളില്‍ പങ്കെടുക്കും.
‘ഒക്ടോബര്‍ 30, 31 തീയതികളില്‍ രണ്ട് ദിവസത്തെ പരിശീലനത്തിന് ഹാജരാകാന്‍ ടീം മാനേജ്മെന്റ് കളിക്കാരോട് ആവശ്യപ്പെട്ടിട്ടുണ്ട്. ഇത് നിര്‍ബന്ധമാണ്, ആര്‍ക്കും ഇത് ഒഴിവാക്കാന്‍ കഴിയില്ല,’ റിപ്പോര്‍ട്ടില്‍ പറയുന്നു.
ന്യൂസിലന്‍ഡിനോട് ഹോം പരമ്പരയിലെ ഞെട്ടിക്കുന്ന തോല്‍വി ഏറ്റുവാങ്ങിയതിന് ശേഷമാണ് കടുത്ത തീരുമാനമെടുത്തത്. മൂന്ന് മത്സരങ്ങളടങ്ങിയ ടെസ്റ്റ് പരമ്പരയില്‍ ഒരു മത്സരം കൂടി ശേഷിക്കെ ആദ്യ രണ്ട് ടെസ്റ്റുകളും ഇന്ത്യ ഇതിനകം തോറ്റിരുന്നു.
