എനിക്ക് അഞ്ചല്ല അഞ്ഞൂറ് പെൺകുട്ടികളെ ഇഷ്ടമാണ്, ഷോയിബ് മാലിക്ക് പറഞ്ഞത് ഇങ്ങനെ; വീഡിയോ വൈറൽ

By
സ്പോര്‍ട്സ് ഡെസ്ക്
|

പാക് സൂപ്പർ താരം ഷൊയ്ബ് മാലിക് സാനിയ മിർസയക്ക് ശേഷം പാക് നടി സന ജാവേദിനെ വിവാഹം ചെയ്തത് ഇന്നലത്തെ പ്രധാന വാർത്തകളിൽ ഒന്നായിരുന്നു. താരത്തിന്റെ ഈ നീക്കത്തിൽ ആരാധകർ ശരിക്കും അശ്വത്ഥരാകുന്ന കാഴ്ച്ച അവരുടെ പ്രതികരണങ്ങളിലൂടെ വ്യക്തമായിരുന്നു. ആയിഷ സിദ്ദിഖിയായിരുന്നു മാലിക്കിൻറെ ആദ്യ ഭാര്യ. പിന്നീട് പ്രശസ്ത ഇന്ത്യൻ ടെന്നീസ് താരം സാനിയ മിർസയെ മാലിക് വിവാഹം കഴിച്ചിരുന്നു. ഇരുവരും തമ്മിൽ വേർപിരിയുകയാണെന്ന അഭ്യൂഹങ്ങൾക്കിടെയാണ് മാലിക് വീണ്ടും വിവാഹിതനായത്.

ഷോയിബ് അക്തറുമായുള്ള മാലിക്കിന്റെ പഴയ സംഭാഷണം സോഷ്യൽ മീഡിയയിൽ വൈറലാവുകയാണ്. താൻ കണ്ട സുന്ദരികളായ അഞ്ച് പെൺകുട്ടികളുടെ പേര് നൽകാൻ മാലിക്കിനോട് അക്തർ ആവശ്യപ്പെട്ടു. “എല്ലാ പെൺകുട്ടികളും സുന്ദരികളാണ്. അഞ്ചെണ്ണം മാത്രമല്ല, 500 പേരെ എനിക്കിഷ്ടമാണ്,” ഷോയിബ് മാലിക് അന്ന് മറുപടിയായി പറഞ്ഞ വാചകങ്ങൾ ഇപ്പോൾ സോഷ്യൽ മീഡിയ ഏറ്റെടുത്തിരിക്കുകയാണ്.

2010ൽ ഹൈദരാബാദിലായിരുന്നു മാലിക്ക്-സാനിയ വിവാഹം. 2018-ൽ ഇരുവർക്കും ഒരു മകൻ ജനിച്ചു. തുടർന്ന് 2022-ലാണ് ഇരുവരും തമ്മിൽ അസ്വാരസ്യങ്ങളുണ്ടെന്നും വിവാഹമോചനത്തിന്റെ വക്കിലാണെന്നുമുള്ള അഭ്യൂഹങ്ങൾ പരന്നത്. എന്നാൽ, ഇക്കാര്യം ഇരുവരും നിഷേധിച്ചിരുന്നു. 1993 ജൂൺ 6 ന് ജനിച്ച സന ജാവേദ് ഉർദു ടെലിവിഷനിലെ സംഭാവനകൾക്ക് അംഗീകാരം ലഭിച്ച ഒരു പ്രശസ്ത പാകിസ്ഥാൻ നടിയാണ്.

2012-ൽ ‘ഷെഹർ-ഇ-സാത്ത്’ എന്ന ഷോയിലൂടെ അഭിനയ ജീവിതം ആരംഭിച്ച അവർ പിന്നീട് നിരവധി സീരിയലുകളിൽ പ്രത്യക്ഷപ്പെട്ടു. ‘ഖാനി’ എന്ന റൊമാന്റിക് നാടകത്തിലെ പ്രധാന കഥാപാത്രത്തെ അവതരിപ്പിച്ചുകൊണ്ട് സന പ്രശസ്തിയിലേക്ക് ഉയർന്നു, ഇത് അവർക്ക് ലക്‌സ് സ്‌റ്റൈൽ അവാർഡ് നോമിനേഷൻ നേടിക്കൊടുത്തു.