ബോളിവുഡ് നടി സാറാ അലി ഖാനുമായി ഡേറ്റിംഗ് നടത്തുന്നതായി പ്രചരിക്കുന്ന അഭ്യൂഹങ്ങളോട് പ്രതികരിച്ച് ഇന്ത്യന്‍ യുവതാരം ശുഭ്മാന്‍. പ്രീതിയുടെയും നീതി സിമോസിന്റെയും പഞ്ചാബി ചാറ്റ് ഷോയായ ദില്‍ ദിയാന്‍ ഗല്ലനിലാണ് സാറയുമായി താന്‍ യഥാര്‍ത്ഥത്തില്‍ ഡേറ്റിംഗ് നടത്തുന്നുണ്ടോ എന്ന ചോദ്യത്തിന് താരം മറുപടി നല്‍കിയത്.
ഗില്‍ നടിയുമായി ഡേറ്റിംഗ് നടത്തുന്നുണ്ടോ എന്ന് ചോദിച്ചപ്പോള്‍, ‘ഒരുപക്ഷേ’ എന്നായിരുന്നു സമൃദ്ധമായി ഗില്‍ മറുപടി നല്‍കിയത്. സത്യം വെളിപ്പെടുത്താന്‍ കൂടുതല്‍ പ്രേരിപ്പിച്ചപ്പോള്‍, ”സാര ദാ സാര സച്ച് ബോള്‍ ദിയ. ആവാം ആവാതിരിക്കാം.’ എന്നാണ് താരം പ്രതികരിച്ചത്.
ഈ വര്‍ഷം ഓഗസ്റ്റില്‍ സാറയും ഗില്ലും മുംബൈയില്‍ അത്താഴം കഴിക്കുന്നത് ഒരു സ്ത്രീ ടിക്‌ടോക്കില്‍ പോസ്റ്റ് ചെയ്തതോടെയാണ് ഊഹാപോഹങ്ങള്‍ ആരംഭിച്ചത്. ഇതില്‍ എരിവുംപുളിയും ചേര്‍ത്ത് വീണ്ടും ഗോസിപ്പുകള്‍ വന്നു. രണ്ടുമാസത്തിനുശേഷം ഇരുവരും വീണ്ടും ഒരു വിമാനത്തില്‍ കണ്ടെത്തി.
വീഡിയോയില്‍ കാണുന്നയാള്‍ക്ക് ഗില്ലിനോട് സാമ്യമുണ്ടെങ്കിലും അത് താരം തന്നെയാണോ എന്ന് സ്ഥിരീകരണം ഉണ്ടായിട്ടില്ല. മറ്റൊരു വീഡിയോയില്‍ വിമാനത്തില്‍ സാറ സെല്‍ഫിയെടുക്കുന്നതിനിടെ ഗില്ലിനെപ്പോലെ തോന്നിക്കുന്ന വ്യക്തിയെ സീറ്റില്‍ വീണ്ടും പാപ്പരാസികള്‍ കണ്ടെത്തിയിരുന്നു.
അതേസമയം, ബംഗ്ലാദേശിനെതിരായ ടെസ്റ്റ് പരമ്പരയ്ക്കുള്ള ടീമില്‍ ഗില്‍ ഇടംപിടിച്ചിട്ടുണ്ട്. വരാനിരിക്കുന്ന ന്യൂസിലന്‍ഡ് ടി20 പരമ്പരയിലും ഗില്‍ ആദ്യമായി ഇടം കണ്ടെത്തി. ന്യൂസിലന്‍ഡിനെതിരായ ഏകദിന ടീമില്‍ സ്ഥാനം നിലനിര്‍ത്തിയെങ്കിലും ബംഗ്ലാദേശിനെതിരായ ഏകദിനത്തില്‍ അദ്ദേഹത്തിന് ഇടംപിടിക്കാനായില്ല.