ഇന്ത്യൻ പ്രീമിയർ ലീഗ് 2025-ൽ മുംബൈ ഇന്ത്യൻസ് തങ്ങളുടെ നിലനിർത്തൽ പട്ടിക പുറത്തുവിട്ടിരുന്നു. ഹാർദിക് പാണ്ഡ്യ, രോഹിത് ശർമ്മ, സൂര്യകുമാർ യാദവ്, ജസ്പ്രീത് ബുംറ, തിലക് വർമ്മ എന്നിവർ റീടെൻഷൻ ലിസ്റ്റിലൂടെ ഇടം കണ്ടെത്തിയപ്പോൾ ഇവർ എല്ലാവരും 18-ാം സീസണിൽ ഫ്രാഞ്ചൈസിയെ പ്രതിനിധീകരിക്കും. 18 കോടി രൂപ പ്രതിഫലവുമായി ബുംറയാണ് ഏറ്റവും കൂടുതൽ തുക കൈപ്പറ്റിയ മുംബൈ താരം.
മുംബൈ ഇന്ത്യൻസ് താരങ്ങളോട് തന്നെ തങ്ങളുടെ ഭാവി തീരുമാനിക്കാൻ ആവശ്യപ്പെടുക ആയിരുന്നു. എന്നാൽ ടീമിനെ നയിക്കണം എന്നുള്ള ആഗ്രഹം സൂര്യകുമാർ യാദവ് ടീം മാനേജ്മെന്റിനോട് ആവശ്യപ്പെടുക ആയിരുന്നു. മുംബൈ നായകൻ ആകാനുള്ള ആഗ്രഹം സൂര്യകുമാർ പ്രകടിപ്പിച്ചെങ്കിലും അങ്ങനെയുള്ള ആഗ്രഹങ്ങൾ ഒന്നും വേണ്ടെന്നുള്ള നിലപാടാണ് മുംബൈ മാനേജ്മെന്റ് അറിയിച്ചത്. എന്തായാലും നീണ്ട ചർച്ചകൾക്ക് ഒടുവിൽ ഹാർദിക്കിന് കീഴിൽ കളിക്കാൻ സൂര്യകുമാർ സമ്മതിക്കുക ആയിരുന്നു.
ഐപിഎൽ 2023ൽ ഒരു മത്സരത്തിനിടെ രോഹിത് ശർമ്മയ്ക്ക് പരിക്കേറ്റപ്പോൾ സൂര്യകുമാർ എംഐയെ നയിക്കുകയും ചെയ്തിരുന്നു. ഐപിഎൽ 2024 ആരംഭിക്കുന്നതിന് മുമ്പ് രോഹിതിനെ ക്യാപ്റ്റൻ സ്ഥാനത്ത് നിന്ന് പുറത്താക്കുകയും പകരം ഹാർദിക് പാണ്ഡ്യയെ നായകനാക്കുകയും ചെയ്തു. എന്നിരുന്നാലും, കഴിഞ്ഞ സീസണിൽ മുംബൈ അവസാന സ്ഥാനത്താണ് പോരാട്ടം അവസാനിപ്പിച്ചത്.
2024ലെ ഐസിസി ടി20 ലോകകപ്പിന് തൊട്ടുപിന്നാലെ രോഹിത് വിരമിച്ചതിന് ശേഷം സൂര്യകുമാറിനെയാണ് ഇന്ത്യ നായകന്റെ ബാൻഡ് ഏൽപ്പിച്ചത്.