ഐപിഎലില്‍ ലഖ്‌നൗ സൂപ്പര്‍ ജയന്റ്‌സിനെതിരായ തോല്‍വിയോടെ പോയിന്റ് ടേബിളില്‍ വീണ്ടും മധ്യഭാഗത്താണ് കൊല്‍ക്കത്ത നൈറ്റ് റൈഡേഴ്‌സിന്റെ സ്ഥാനം. അഞ്ച് കളികളില്‍ രണ്ട് ജയവും മൂന്ന് തോല്‍വിയുമാണ് അവര്‍ക്കുളളത്. നിലവിലെ ചാമ്പ്യന്മാരായ കൊല്‍ക്കത്ത കഴിഞ്ഞ തവണത്തെ പോലെയുളള പ്രകടനം ഇത്തവണ ആവര്‍ത്തിക്കുന്നില്ല എന്നത് അവരുടെ പോരായ്മയാണ്. ടീമിലെ ഫിനിഷറായ റിങ്കു സിങ്ങിനെ പലപ്പോഴും വൈകി ഇറക്കുന്നത് സംബന്ധിച്ച് വലിയ രീതിയിലുളള വിമര്‍ശനങ്ങളാണ് കെകെആറിനുണ്ടായിട്ടുളളത്. ലഖ്‌നൗവിനെതിരായ കഴിഞ്ഞ കളിയില്‍ എട്ടാമനായിട്ടാണ് റിങ്കു സിങ് ഇറങ്ങിയിരുന്നത്.
ഒരു ഘട്ടത്തില്‍ ടീം പരാജയമുറപ്പിച്ച സമയത്തായിരുന്നു റിങ്കുവിന്റെ വരവ്. എന്നാല്‍ 15 ബോളില്‍ 38 റണ്‍സെടുത്ത് കൊല്‍ക്കത്തയെ വിജയത്തിന് അടുത്ത് വരെ എത്തിക്കാന്‍ റിങ്കുവിനായി. വെറും നാല് റണ്‍സിനായിരുന്നു ലഖ്‌നൗവിനോട് കെകെആര്‍ കഴിഞ്ഞ കളിയില്‍ അടിയറവ് വച്ചത്. അതേസമയം റിങ്കു സിങിന്റെ ബാറ്റിങ് പൊസിഷനെ കുറിച്ച് മുന്‍ ഇന്ത്യന്‍ ക്രിക്കറ്റ് ടീം ക്യാപ്റ്റന്‍ സൗരവ് ഗാംഗുലി മനസുതുറന്നിരുന്നു. റിങ്കു സിങിനെ വളരെ താഴെയായി ബാറ്റിങ്ങില്‍ ഇറക്കുന്നതില്‍ തനിക്ക് ആശങ്കയുണ്ടെന്നാണ് അദ്ദേഹം പറയുന്നത്.
“കൊല്‍ക്കത്തയ്ക്ക് അതിശയകരമായ ചില കളിക്കാരുണ്ട്. ക്യാപ്റ്റന്‍ രഹാനെ തന്നെ മികച്ച ഫോമിലാണ്. എന്റെ ഒരേയൊരു ആശങ്ക റിങ്കു സിങിനെ വളരെ താഴെയായി ബാറ്റിങ്ങ് പൊസിഷനില്‍ ഇറക്കുന്നുവെന്നതാണ്. ഇപ്പോള്‍ ടൂര്‍ണമെന്റിന്റെ തുടക്കസമയമാണ്. എനിക്ക് ഉറപ്പുണ്ട് മതിയായ അവസരങ്ങള്‍ ടീമിലെ എല്ലാവര്‍ക്കും ലഭിക്കുമെന്ന്, സൗരവ് ഗാംഗുലി പറഞ്ഞു.