ടി20 ലോകകപ്പിനുള്ള ടീമില്‍ ഇടംപിടിച്ചിരിക്കുകയാണ് മലയാളി താരം സഞ്ജു സാംസണ്‍. ഒമ്പത് വര്‍ഷം നീണ്ട ഇന്ത്യന്‍ ടീം കരിയറില്‍ ഇതാദ്യമായാണ് സഞ്ജു ഒരു ലോകകപ്പ് ടീമില്‍ ഇടംനേടുന്നത്. ഇതിനു പിന്നാലെ സഞ്ജുവിന് ആശംസകള്‍ നേര്‍ന്ന് രംഗത്തെത്തിയിരിക്കുകയാണ് മലയാളി താരവും മുന്‍ ലോകകപ്പ് ജേതാവുമായ എസ് ശ്രീശാന്ത്.
നമസ്‌കാരം, വളരെയധികം സന്തോഷവും അഭിമാനവും തോന്നുന്നു. 2007, 2011 ലോകകപ്പ് ഇന്ത്യ ജയിച്ചപ്പോള്‍ ഒരു മലയാളി സാന്നിധ്യമുണ്ടായിരുന്നു. സഞ്ജു സാംസണ്‍ മോനെ അടിപൊളി. മലയാളി പുലിയാടാ. എല്ലാ ഭാവുകങ്ങളും നേരുന്നു. ദൈവം അനുഗ്രഹിക്കട്ടെ.
സഞ്ജുവിന് ലോകകപ്പ് ഇന്ത്യയിലേക്കെത്തിക്കാന്‍ സാധിക്കെട്ടെ. അവന്‍ അര്‍ഹിക്കുന്ന നേട്ടത്തിലേക്കാണ് എത്തിയിരിക്കുന്നത്. ലോകമെമ്പാടുമുള്ള ക്രിക്കറ്റ് ആരാധകര്‍ അവനൊപ്പം നില്‍ക്കണം. എല്ലാ ഭാവുകങ്ങളും ഒരിക്കല്‍ക്കൂടി നേരുന്നു- ശ്രീശാന്ത് തന്റെ ഇന്‍സ്റ്റഗ്രാമില്‍ പങ്കുവെച്ച വീഡിയോയില്‍ പറഞ്ഞു.
എന്നാല്‍ ഇതിന് പിന്നാലെ ശ്രീശാന്തിനെതിരെ വിമര്‍ശിച്ച് ആരാധകര്‍ രംഗത്തുവന്നിരിക്കുകയാണ്. കാരണം 2023ലെ ഏകദിന ലോകകപ്പില്‍ സഞ്ജു സാംസണ്‍ സ്‌ക്വാഡില്‍ ഇടംപിടിക്കാതിരുന്നപ്പോള്‍ അതിനെ പിന്തുണച്ചയാളാണ് ശ്രീശാന്ത്.
സഞ്ജുവിന്റെ മനോഭാവം ശരിയല്ലെന്നും തെറ്റുകളില്‍ നിന്ന് പഠിക്കുന്നില്ലെന്നും ശ്രീശാന്ത് വിമര്‍ശിച്ചിരുന്നു. ഇതാണ് ആരാധകര്‍ ഇപ്പോള്‍ വിമര്‍ശനത്തിന് വിഷയമാക്കിയിരിക്കുന്നത്.