അല്പം മസാലയില്ലാത്ത ജീവിതം എങ്ങനെ ഇരിക്കും ? ക്രിക്കറ്റ് കളിയാണെങ്കിലും ജീവിതത്തിൽ ആയാലും മസാലകൾ രുചി കൂട്ടുന്നു. ചെന്നൈ സൂപ്പർ കിംഗ്‌സും രാജസ്ഥാൻ റോയൽസും തമ്മിലുള്ള ഹൈ-വോൾട്ടേജ് മത്സരത്തിൽ ആവേശത്തിനിടക്ക് അൽപ്പം മസാല കൂട്ടിയ ഒരു സംഭവം നടന്നു . ബുധനാഴ്ച ചെന്നൈയിലെ എംഎ ചിദംബരം സ്റ്റേഡിയത്തിൽ നടന്ന മത്സരത്തിൽ രണ്ട് ഇന്ത്യൻ താരങ്ങളായ രവിചന്ദ്രൻ അശ്വിനും അജിങ്ക്യ രഹാനെയും അത്തരത്തിൽ ഒരു മൈൻഡ് ഗെയിം കളിച്ചു.
രാജസ്ഥാൻ ഉയർത്തിയ സ്കോർ പിന്തുടർന്ന ചെന്നൈയുടെ ബാറ്റിംഗ് നടന്ന സമയത്താണ് സംഭവം നടന്നത്. പവർ പ്ലേക്ക് തൊട്ടുമുമ്പുള്ള ആറാം ഓവറിന്റെ രണ്ടാം പന്തിൽ അജിങ്ക്യ രഹാനെയ്‌ക്കെതിരെ പന്തെറിയാൻ എത്തിയ അശ്വിനാണ് സംഭവം തുടങ്ങിയത്, പന്തെറിയുന്നതിന് തൊട്ടുമുമ്പ് അശ്വിൻ പിന്മാറ്റം നടത്തി. ബോള് നേരിടാൻ നിന്ന രഹാനയെ ചെറുതായി പറ്റിച്ച സന്തോഷത്തിലായിരുന്നു അശ്വിൻ അപ്പോൾ,
നീ പണി തന്നല്ലേ ഇതാ എന്റെ വക മറുപണി എന്ന രീതിയിൽ രഹാനെ തൊട്ടടുത്ത പന്തിൽ അശ്വിനെ പറ്റിച്ചു.. അശ്വിൻ ബൗൾ ചെയ്യാനൊരുങ്ങിയപ്പോൾ രഹാനെ വിക്കറ്റിൽ നിന്ന് മാറി നിന്നു , താൻ റെഡി അല്ലെന്ന ഭാവത്തിൽ. തുടർന്ന് ഓവറിലെ മൂന്നാം പന്തിൽ രഹാനെ അശ്വിനെയും സിക്സറിന് പറത്തുകയും ചെയ്തു. എന്നിരുന്നാലും, ആത്യന്തികമായി 10-ാം ഓവറിൽ അശ്വിൻ വിക്കറ്റിന് മുന്നിൽ കുടുക്കിയപ്പോൾ രഹാനെ വീണു.
എന്തായാലും രണ്ട് ഇന്ത്യൻ താരങ്ങൾ തമ്മിലുള്ള യുദ്ധം ആരാധകർ ശരിക്കും ആഘോഷിച്ചു.