ട്വന്റി20 ക്രിക്കറ്റ് ലോക കപ്പിന്റെ സൂപ്പര്‍ 12 മത്സരങ്ങള്‍ ആരംഭിക്കാന്‍ ദിവസങ്ങള്‍മാത്രം അവശേഷിക്കെ ഇംഗ്ലണ്ടിനെ പരിക്ക് വേട്ടയാടുന്നു. ബാറ്റിംഗ് ഓള്‍ റൗണ്ടര്‍ ലിയാം ലിവിംഗ്സ്റ്റന്റെ വിരലിനാണ് പരിക്കേറ്റത്. ബെന്‍ സറ്റോക്‌സിന് പകരം ടീമിലെടുത്ത ലിവിംഗ്സ്റ്റന് ലോക കപ്പ് നഷ്ടപ്പെടുമെന്നാണ് വിവരം.
ഇന്ത്യയുമായുള്ള സന്നാഹ മത്സരത്തിനിടെയാണ് ലിവിംഗ്സ്റ്റന് പരിക്കേറ്റത്. കളിയുടെ അന്ത്യവേളകളില്‍ ബൗണ്ടറിക്കരുകില്‍ ക്യാച്ചിന് ശ്രമിക്കവെ ലിവിംഗ്സ്റ്റന്റെ വിരലിന് പരിക്കേല്‍ക്കുകയായിരുന്നു. താരത്തിന്റെ പരിക്ക് സംബന്ധിച്ച് ഇംഗ്ലണ്ട് മാനേജ്‌മെന്റ് കൂടുതല്‍ പരിശോധനകള്‍ നടത്തുന്നുണ്ട്. വരുന്ന 24 മണിക്കൂറിനുള്ളില്‍ ലിവിംഗ്സ്റ്റണ്‍ ലോക കപ്പ് കളിക്കുമോ എന്നതില്‍ തീരുമാനമാകും.
സന്നാഹ മത്സരത്തില്‍ ലിവിംഗ്സ്റ്റണ്‍ മികച്ച പ്രകടനമാണ് പുറത്തെടുത്തത്. 20 പന്തില്‍ 30 റണ്‍സ് നേടിയ ലിവിംഗ്സ്റ്റണ്‍ ഇന്ത്യന്‍ ക്യാപ്റ്റന്‍ വിരാട് കോഹ്ലിയെയും പുറത്താക്കിയിരുന്നു. അതിനാല്‍ത്തന്നെ ലിവിംഗ്സ്റ്റണ്‍ കളിച്ചില്ലെങ്കില്‍ ഇംഗ്ലണ്ടിന് അത് വലിയ തിരിച്ചടിയാകുമെന്ന് വിലയിരുത്തപ്പെടുന്നു.