ആഷസ് പരമ്പരയിലെ രണ്ടാം ക്രിക്കറ്റ് ടെസ്റ്റില്‍ നിലനില്‍പ്പിനായി പോരാടുന്ന ഇംഗ്ലണ്ടിന് തിരിച്ചടിയായി ക്യാപ്റ്റന്‍ ജോ റൂട്ടിന്റെ പരിക്ക്. വാം അപ്പിനിടെ അടിവയറിന് പരിക്കേറ്റ റൂട്ട് നാലാം ദിനത്തെ കളിയുടെ തുടക്കത്തില്‍ ഫീല്‍ഡിംഗിന് ഇറങ്ങിയില്ല.
വാം അപ്പിനിടെ ക്യാച്ചിംഗ് പരിശീലിക്കവെയാണ് റൂട്ടിന്റെ അടിവയറ്റില്‍ പന്തു കൊണ്ടത്. ഇംഗ്ലീഷ് മെഡിക്കല്‍ ടീം റൂട്ടിന്റെ ആരോഗ്യനില നിരീക്ഷിക്കുന്നുണ്ട്.
ഒന്നാം ടെസ്റ്റില്‍ വന്‍ തോല്‍വി വഴങ്ങിയ ഇംഗ്ലണ്ട് പ്രതിരോധത്തിലാണ്. അഡ്‌ലെയ്ഡിലെ രണ്ടാം ടെസ്റ്റിലും ഓസ്‌ട്രേലിയ പിടിമുറുക്കിക്കഴിഞ്ഞു. റൂട്ടിന്റെ ബാറ്റിംഗാണ് ഇംഗ്ലണ്ടിന അല്‍പ്പമെങ്കിലും താങ്ങിനിര്‍ത്തിയത്. അതിനാല്‍ത്തന്നെ റൂട്ടിന്റെ ഫിറ്റ്‌നസ് ഇംഗ്ലണ്ടിനെ സംബന്ധിച്ച് അതി നിര്‍ണായകമാണ്.