ബംഗ്ലാദേശിനെതിരായ രണ്ടാം ടി20യിൽ ടോസ് നേടിയാൽ ആദ്യം ബാറ്റ് ചെയ്ത് ഇന്ത്യ വെല്ലുവിളിക്കണം എന്ന് ആകാശ് ചോപ്ര. ടോസ് നേടിയാൽ നജ്മുൽ ഹൊസൈൻ ഷാൻ്റോ ആദ്യം ഫീൽഡ് ചെയ്യുമെന്നതിനാൽ ഇന്ത്യ ഈ മത്സരത്തിൽ ബാറ്റ് ചെയ്യും എന്നത് ഉറപ്പിച്ച് ആ കാര്യം താരങ്ങളോട് ഇപ്പോൾ തന്നെ നായകൻ പറയണം എന്നും ചോപ്ര പറഞ്ഞു.
മൂന്ന് മത്സരങ്ങളുള്ള പരമ്പരയിലെ രണ്ടാം മത്സരം ഒക്‌ടോബർ 9 ബുധനാഴ്ച ഡൽഹിയിൽ നടക്കും. ഒക്‌ടോബർ 6 , ഞായറാഴ്ച ഗ്വാളിയോറിൽ നടന്ന ആദ്യ മത്സരത്തിൽ ഇന്ത്യ ഏഴ് വിക്കറ്റിൻ്റെ ഉജ്ജ്വല വിജയം സ്വന്തമാക്കിയിരുന്നു. തൻ്റെ യൂട്യൂബ് ചാനലിൽ പങ്കിട്ട ഒരു വീഡിയോയിൽ, ഡൽഹിയിൽ ഇന്ത്യ ആദ്യം ബാറ്റ് ചെയ്യണോ എന്ന ചോദ്യത്തിന് ചോപ്ര മറുപടി നൽകി.
“ഒരു അന്താരാഷ്ട്ര മത്സരമോ പരമ്പരയോ ജയിക്കണമെന്ന് നിങ്ങൾ പൊതുവെ വിചാരിക്കുന്നു. അപ്പോൾ നിങ്ങൾ 70 ശതമാനത്തിൽ കളിച്ചാലും വിജയിക്കുമെന്ന് നിങ്ങൾ കരുതുന്നു. നിങ്ങൾ രണ്ട് കളിക്കാർക്ക് അരങ്ങേറ്റം നൽകുന്നു, പക്ഷേ ഇപ്പോഴും ഏകപക്ഷീയമായി വിജയിക്കും. നിങ്ങൾ വെറുതെ എളുപ്പത്തിൽ ജയിച്ചിട്ട് എന്ത് കാര്യം, വെല്ലുവിളി ഏറ്റെടുത്ത് ജയിക്കുക.”
“അതിനാൽ നിങ്ങൾ സ്വയം വെല്ലുവിളിക്കണം. നിങ്ങൾക്ക് ആന്തരിക പ്രചോദനം ആവശ്യമാണ്. അതിന്, ഡൽഹിയിൽ ടോസ് നേടിയാൽ ആദ്യം ബാറ്റ് ചെയ്യണമെന്ന് ഞാൻ പറയും. ടോസ് നേടിയാൽ എതിർ ടീം എന്തായാലും നിങ്ങളോട് ബാറ്റ് ചെയ്യാൻ ആവശ്യപ്പെടും. അതിനാൽ തന്നെ നിങ്ങൾ ആദ്യം ബാറ്റ് ചെയ്യാൻ പോകുകയാണെന്ന് നിങ്ങളുടെ താരങ്ങളോട് പറയുക,” ചോപ്ര കൂട്ടിച്ചേർത്തു.
മായങ്ക് യാദവിനും നിതീഷ് കുമാർ റെഡ്ഡിക്കും ആദ്യ ടി20യിൽ ഇന്ത്യ അരങ്ങേറാൻ അവസരം നൽകിയിരുന്നു. പല മുൻനിര താരങ്ങളെ നഷ്ടമായെങ്കിലും, ഇന്ത്യ കടുവകളെ 127 റൺസിന് പുറത്താക്കി, 49 പന്തുകൾ ശേഷിക്കെ ലക്ഷ്യം കൈവരിക്കുകയും ചെയ്തു.