ടി20 ലോകകപ്പില്‍ തകര്‍പ്പന്‍ പ്രകടനമാണ് ഇന്ത്യന്‍ താരം സൂര്യകുമാര്‍ കാഴ്ചവയ്ക്കുന്നത്. സിംബാബ്‌വെയ്‌ക്കെതിരായ പ്രകടനം താരത്തിന്റെ മൂല്യത്തെ മാറ്റൊരു തലത്തിലേക്ക് ഉയര്‍ത്തിയിരിക്കുകയാണ്. മത്സരത്തില്‍ താരം സ്‌കൂപ്പ് ഷോട്ടിലൂടെ നേടിയ സിക്സര്‍ ഏറെ ശ്രദ്ധിക്കപ്പെട്ടു. ഇപ്പോഴിതാ അത്തരം ഷോട്ടുകള്‍ കളിക്കാന്‍ താന്‍ നടത്തുന്ന പരിശീലനത്തെക്കുറിച്ച് പറഞ്ഞിരിക്കുകയാണ് സൂര്യകുമാര്‍.
റബര്‍ ബോളില്‍ കളിച്ചാണ് ഞാന്‍ അത്തരം ഷോട്ടുകള്‍ പരിശീലിക്കുന്നത്. ബോളര്‍ എന്താണ് ചെയ്യാന്‍ പോകുന്നതെന്ന് ഏതാണ്ടൊരു ധാരണ ഉള്ളില്‍ ഉണ്ടാകണം. കരുതിക്കൂട്ടിത്തന്നെ അത്തരം സന്ദര്‍ഭങ്ങളില്‍ ബാറ്റ് വീശുകയും ചെയ്യുന്നു.
ബാറ്റ് ചെയ്യുമ്പോള്‍ ബൗണ്ടറിയുടെ നീളമടക്കം മനസിലുണ്ടാകും. 60-65 മീറ്ററായിരിക്കും മിക്കവാറും. പന്തിന്റെ വേഗമനുസരിച്ച് ഷോട്ടുകള്‍ തിരഞ്ഞെടുക്കുന്നു. അങ്ങനെ ബാറ്റ് ചെയ്യുമ്പോള്‍ ഉദ്ദേശിച്ച സ്ഥലത്ത് തന്നെ പന്ത് കൊള്ളുകയും അത് അതിര്‍ത്തി കടക്കുകയും ചെയ്യും.’
‘ബാറ്റിംഗിന് ഇറങ്ങിയാല്‍ ബൗണ്ടറികള്‍ നേടാന്‍ ശ്രമിക്കും. അതിന് സാധിച്ചില്ലെങ്കില്‍ വിക്കറ്റുകള്‍ക്കിടയിലൂടെ ഓടി റണ്‍സ് പരമാവധി കണ്ടെത്തും. വിരാട് ഭായിക്കൊപ്പം ബാറ്റ് ചെയ്യുമ്പോള്‍ നമ്മളും വേഗതയില്‍ ഓടേണ്ടി വരും.ആ സമയങ്ങളിലൊക്കെ ഏതൊക്കെ ഷോട്ടുകള്‍ കളിക്കാന്‍ സാധിക്കുമെന്ന ബോധ്യം എനിക്കുണ്ട്. അത്തരം ഷോട്ടുകള്‍ക്കായി ശ്രമം നടത്തും.
സ്വീപ്പ്, ഓവര്‍ കവര്‍, കട്സ് എന്നിവയൊക്കെ എനിക്ക് പ്രിയപ്പെട്ടവയാണ്. അത്തരം ഷോട്ടുകള്‍ കളിച്ച് വിജയിച്ചാല്‍ മുന്നോട്ടു പോകാനുള്ള ആത്മവിശ്വാസം തനിക്ക് വര്‍ധിക്കുമെന്നും സൂര്യകുമാര്‍ പറഞ്ഞു.