നവംബര്‍ 10 ന് അഡ്ലെയ്ഡില്‍ നടക്കുന്ന 2022 ടി20 ലോക കപ്പിന്റെ രണ്ടാം സെമിഫൈനലില്‍ ഇംഗ്ലണ്ടിനെ നേരിടാന്‍ ഒരുങ്ങുന്ന ഇന്ത്യയ്ക്ക് അപ്രതീക്ഷിത തിരിച്ചടി. നായകന്‍ രോഹിത് ശര്‍മ്മയ്ക്ക് പരിക്കേറ്റെന്ന് വാര്‍ത്ത ഇന്ത്യന്‍ ക്യാമ്പിനെ നിശ്ശബ്ദമാക്കിയിരിക്കുകയാണ്.
ചൊവ്വാഴ്ച നെറ്റ്‌സില്‍ പരിശീലനത്തിനിടെയാണ് രോഹിത്തിന് പരിക്കേറ്റത്. വലത് കൈത്തണ്ടയില്‍ പന്ത് കൊണ്ടാണ് താരത്തിന് പരിക്കേറ്റത്. ടീമിന്റെ ത്രോഡൗണ്‍ സ്‌പെഷ്യലിസ്റ്റ് രഘുവിനെ അഭിമുഖീകരിക്കുന്നതിനിടെയാണ് ഒരു പന്ത് താരത്തിന്റെ കൈയില്‍ തട്ടിയത്.
തുടര്‍ന്ന് രോഹിത് തന്റെ പ്രാക്ടീസ് നിര്‍ത്തി കൈയില്‍ ഒരു ഐസ് പാക്കുമായി ഇരിക്കുന്നതിന്റെ ചിത്രങ്ങള്‍ പുറത്തുവന്നിട്ടുണ്ട്. തുടര്‍ന്നു പരിശീലനം തുടരാന്‍ താരം ശ്രമം നടത്തി നോക്കിയെങ്കിലും ഫലം കണ്ടില്ല. താരത്തിന്റെ പരിക്ക് സാരമുള്ളതാണോ എന്ന് വ്യക്തമല്ല.
രോഹിത്തിന്റെ പരിക്ക് സംബന്ധിച്ച് ഔദ്യോഗിക വിവരങ്ങളൊന്നും പുറത്തുവന്നിട്ടില്ല. സാധാരണയായി, മെഡിക്കല്‍ സംഘം സമഗ്രമായ അന്വേഷണത്തിലൂടെ കടന്നുപോകുന്നതുവരെ ഔദ്യോഗിക പ്രസ്താവനകള്‍ പ്രതീക്ഷിക്കുന്നില്ല.