ജൂണില്‍ അമേരിക്കയും (യുഎസ്എ) വെസ്റ്റ് ഇന്‍ഡീസും ചേര്‍ന്ന് ആതിഥേയത്വം വഹിക്കുന്ന ടി20 ലോകകപ്പിന്റെ ഫൈനലിസ്റ്റുകളെ പ്രവചിച്ച് ക്രിക്കറ്റ് ഇതിഹാസം സുനില്‍ ഗവാസ്‌കര്‍. സ്റ്റാര്‍ സ്പോര്‍ട്സുമായുള്ള ഒരു ചര്‍ച്ചയില്‍, ഇന്ത്യയും ഓസ്ട്രേലിയയും ഫൈനലില്‍ എത്തുമെന്ന് ഗവാസ്‌കര്‍ പ്രവചിച്ചു.
ഓസ്ട്രേലിയ വിജയിച്ച 2023 ഏകദിന ലോകകപ്പ് കിരീടത്തിനായി മത്സരിച്ച അതേ രണ്ട് ടീമുകള്‍ തന്നെ ടി20 ലോകകപ്പിലും ഏറ്റുമുട്ടുമെന്ന് ഗവാസ്‌കര്‍ പറഞ്ഞു. ഈ ടീമുകളിലുള്ള അദ്ദേഹത്തിന്റെ ആത്മവിശ്വാസം അവരുടെ ശക്തമായ ക്രിക്കറ്റ് ചരിത്രത്തില്‍ നിന്നും കരുത്തുറ്റ ടീം ലൈനപ്പുകളില്‍ നിന്നുമാണ്.
ജൂണ്‍ ഒന്നിന് ഡാലസിലെ ഗ്രാന്‍ഡ് പ്രെയറി സ്റ്റേഡിയത്തില്‍ യു.എസ്.എയും കാനഡയും തമ്മില്‍ ഉദ്ഘാടന മത്സരം നടക്കും. ടീമുകളെ നാല് ഗ്രൂപ്പുകളായി തിരിച്ചിരിക്കുന്നു, ഓരോ ഗ്രൂപ്പിലെയും ആദ്യ രണ്ട് സ്ഥാനക്കാര്‍ സൂപ്പര്‍ എട്ട് ഘട്ടത്തിലേക്ക് മുന്നേറും.
സൂപ്പര്‍ എട്ട് പിന്നീട് രണ്ട് ഗ്രൂപ്പുകളായി തിരിക്കും. ഓരോ ഗ്രൂപ്പുകളില്‍നിന്നും ലീഡ് ചെയ്യുന്ന രണ്ട് ടീമുകള്‍ സെമി ഫൈനലിലേക്ക് മുന്നേറും. ജൂണ്‍ 29 ന് ബാര്‍ബഡോസിലെ കെന്‍സിംഗ്ടണ്‍ ഓവലിലാണ് ഫൈനല്‍.