ടി20 ലോകകപ്പില്‍ ആദ്യ മത്സരത്തില്‍ അമേരിക്കയോട് തോറ്റ പാകിസ്ഥാന് ടീമിനെ എഴുതിത്തള്ളാറായിട്ടില്ലെന്ന് പാക് ഇതിഹാസ പേസര്‍ ശുഐബ് അക്തര്‍. പാകിസ്ഥാന് ഈ ലോകകപ്പില്‍ ഇനിയും തിരിച്ചുവരാമെന്നും എതിരാളികള്‍ ഇന്ത്യയാണെന്നത് പാക് ടീമിനെ പ്രചോദിപിപ്പിക്കുമെന്നും അക്തര്‍ പറഞ്ഞു.
അമേരിക്കയോടേറ്റ അപ്രതീക്ഷിത തോല്‍വിക്കു ശേഷം പാകിസ്ഥാന് ഇന്ത്യക്കെതിരേ ജയിക്കാന്‍ കഴിയുമോയെന്നു ഒരുപാട് ആരാധകര്‍ എന്നോടു ചോദിച്ചു കൊണ്ടിരിക്കുകയാണ്. പാക് ടീമിനെ സംബന്ധിച്ച് ഈ തോല്‍വി ഏറെ നിരാശാജനകം തന്നെയാണ്. പാക് ടീം കഴിവിന്റെ പരമാവധി കളിക്കളത്തില്‍ നല്‍കാന്‍ ശ്രമിക്കുന്നില്ലെന്നാണ് എനിക്കു തോന്നിയിട്ടുള്ളത്.
പാക് താരങ്ങള്‍ സ്വയം പ്രകടപ്പിക്കുന്നില്ലെന്നാണ് എനിക്കു തോന്നിയിട്ടുള്ളത്. കൂടാതെ ടീം കോമ്പിനേഷന്‍ എങ്ങനെയാവണമെന്ന കാര്യത്തിലും വ്യക്തമായ ധാരണയില്ല. ആരാധകരുടെ നിരാശ എനിക്കു മനസ്സിലാവും. ഞാന്‍ അതിനോടു യോജിക്കുകയും ചെയ്യുന്നു.
ഇന്ത്യക്കെതിരായ അടുത്ത മല്‍സരവും തോല്‍ക്കുകയാണെങ്കില്‍ 2026ലെ ടി20 ലോകകപ്പിന്റെ ഭാഗമാവണമെങ്കില്‍ പാകിസ്ഥാനു യോഗ്യതാ റൗണ്ട് കളിക്കേണ്ടതായി വരും. പാകിസ്ഥാനെ സംബന്ധിച്ച് അത് വലിയ നാണക്കേട് തന്നെയായിരിക്കും.
പാകിസ്ഥാന് ഈ ലോകകപ്പില്‍ ഇനിയും തിരിച്ചുവരാം. ഇന്ത്യ വളരെ കടുപ്പമേറിയ എതിരാളികള്‍ തന്നെയാണ്. എതിരാളികള്‍ ഇന്ത്യയാണെന്നത് പാക് ടീമിനെ പ്രചോദിപിപ്പിക്കും. പാകിസ്ഥാന് ഈ ലോകകപ്പിലേക്കു തിരിച്ചുവരുമെന്നു തന്നെയാണ് ഞാന്‍ പ്രതീക്ഷിക്കുന്നത്.
പക്ഷെ അതിനു വേണ്ടു താരങ്ങള്‍ക്കു കുറേക്കൂടി അഗ്രസീവായി, തുറന്ന് കളിക്കേണ്ടതായി വരും. ബാബറില്‍ വലിയ പ്രതീക്ഷയാണുള്ളത്. ഇന്ത്യക്കെതിരേ അവന്‍ ചില മാജിക്ക് പുറത്തെടുക്കുമെന്നു പ്രതീക്ഷിക്കുന്നു- അക്തര്‍ കൂട്ടിച്ചേര്‍ത്തു.
Read more
