ഐപിഎൽ മെഗാ ലേലത്തിൽ ടീം ഇന്ത്യയുടെ വിക്കറ്റ് കീപ്പർ-ബാറ്റർ റിഷഭ് പന്ത് വൻ തുകയ്ക്ക് വിൽക്കപ്പെടാൻ അർഹനാണെന്ന് മുൻ പാകിസ്ഥാൻ ക്രിക്കറ്റ് താരം ബാസിത് അലി . ഇന്ത്യയും ന്യൂസിലൻഡും തമ്മിലുള്ള അടുത്തിടെ സമാപിച്ച മുംബൈ ടെസ്റ്റിൽ താരത്തിന്റെ ഇരട്ട അർധസെഞ്ചുറി പ്രകടനത്തിന് ശേഷമാണ് അദ്ദേഹത്തിൻ്റെ അഭിപ്രായങ്ങൾ.
ഋഷഭ് പന്തിനെ ഡൽഹി ക്യാപിറ്റൽസ് വിട്ടയച്ചത് ഏവരെയും ഞെട്ടിച്ചു. വരാനിരിക്കുന്ന മെഗാ ലേലത്തിൽ താരത്തിന് 50 കോടി രൂപ ലഭിക്കുമെന്ന് ബാസിത് അഭിപ്രായപ്പെട്ടു. തൻ്റെ യൂട്യൂബ് ചാനലിൽ പങ്കിട്ട ഒരു വീഡിയോയിൽ സംസാരിക്കുമ്പോൾ അദ്ദേഹം ഇങ്ങനെ പറഞ്ഞു:
“റിഷഭ് പന്ത് ആദ്യ ഇന്നിംഗ്‌സിൽ 60 ഉം രണ്ടാം ഇന്നിംഗ്‌സിൽ 64 ഉം സ്‌കോർ ചെയ്തു. ഈ കുട്ടിയെ കുറിച്ച് ഞാൻ എന്താണ് പറയുക? ഐപിഎൽ ലേലത്തിൽ 25 കോടിക്ക് പോകണമെന്ന് ആളുകൾ പറയുന്നു. എന്നിരുന്നാലും, അവനെ 50 കോടിക്ക് വിൽക്കണമെന്ന് ഞാൻ കരുതുന്നു. അവൻ അത്ര മികച്ചവനാണ്.
പന്ത് മാത്രമാണ് മുംബൈ ടെസ്റ്റിൽ ഇന്ത്യയുടെ മാനം രക്ഷിക്കുന്ന പ്രകടനം നടത്തിയത് എന്ന് പറയാം. വിജയത്തോടെ മൂന്ന് മത്സരങ്ങളുടെ ടെസ്റ്റ് പരമ്പരയിൽ സ്വന്തം തട്ടകത്തിൽ ഇന്ത്യയെ വൈറ്റ് വാഷ് ചെയ്യുന്ന ആദ്യ ടീമായി ന്യൂസിലൻഡ് മാറി.