ചാമ്പ്യന്‍സ് ട്രോഫിക്കായി ഇന്ത്യ നാട്ടിലേക്ക് വന്നില്ലെങ്കില്‍ 2024 മുതല്‍ 2031 വരെയുള്ള ഒരു ഐസിസി ഇവന്റിലും പങ്കെടുക്കാന്‍ മെന്‍ ഇന്‍ ഗ്രീനെ പാകിസ്ഥാന്‍ സര്‍ക്കാര്‍ അനുവദിച്ചേക്കില്ലെന്ന് പാക് മുന്‍ ക്യാപ്റ്റന്‍ റാഷിദ് ലത്തീഫ് വെളിപ്പെടുത്തി. സുരക്ഷാ കാരണങ്ങളാല്‍ അയല്‍രാജ്യത്ത് മത്സരിക്കാനുള്ള വിസമ്മതം ഇന്ത്യന്‍ ക്രിക്കറ്റ് കണ്‍ട്രോള്‍ ബോര്‍ഡ് അന്താരാഷ്ട്ര ക്രിക്കറ്റിന്റെ അപ്പെക്‌സ് ബോഡിയെ അറിയിച്ചിരുന്നു.
വരാനിരിക്കുന്ന ഐസിസി ടൂര്‍ണമെന്റില്‍ ഇന്ത്യയുടെ നിലപാടിനെക്കുറിച്ച് ഐസിസിയില്‍ നിന്ന് ഇമെയില്‍ ലഭിച്ചതായി പിസിബി സ്ഥിരീകരിച്ചു. ഇന്ത്യന്‍ ക്രിക്കറ്റ് ബോര്‍ഡിനെതിരെ നിയമനടപടി സ്വീകരിക്കാനാണ് പാകിസ്ഥാന്‍ ക്രിക്കറ്റ് ബോര്‍ഡിന്റെയും പാക് വിദേശകാര്യ ഉദ്യോഗസ്ഥരുടെയും ആലോചന.
അതേസമയം, മെഗാ ടൂര്‍ണമെന്റില്‍ ഇന്ത്യ കളിക്കാന്‍ വിസമ്മതിച്ചാല്‍ സ്വന്തം രാജ്യത്ത് നടക്കുന്ന ചാമ്പ്യന്‍സ് ട്രോഫി ബഹിഷ്‌കരിക്കണമെന്ന് പാകിസ്ഥാനോട് ആവശ്യപ്പെട്ട റാഷിദ് ഇപ്പോള്‍ മറ്റൊരു വലിയ പ്രസ്താവന നടത്തിയിരിക്കുകയാണ്.
‘സ്രോതസ്സുകള്‍ പ്രകാരം, ഐസിസി ചാമ്പ്യന്‍സ് ട്രോഫിയില്‍ ഇന്ത്യ പങ്കെടുത്തില്ലെങ്കില്‍ (2024-2031) ഒരു ഐസിസി ഇവന്റിലും (20242031) പങ്കെടുക്കാന്‍ പാകിസ്ഥാന്‍ സര്‍ക്കാര്‍ പിസിബിയെ അനുവദിച്ചേക്കില്ല അല്ലെങ്കില്‍ ചാമ്പ്യന്‍സ് ട്രോഫി പാകിസ്ഥാനില്‍ നിന്ന് മാറ്റപ്പെടും,’ റാഷിദ് ലത്തീഫ് എക്‌സില്‍ കുറിച്ചു.
2008 ഏഷ്യാ കപ്പിന് ശേഷം ഇന്ത്യ പാകിസ്ഥാനില്‍ കളിച്ചിട്ടില്ല. മറുവശത്ത്, 2016 ടി20 ലോകകപ്പിനും 2023ലെ ഏകദിന ലോകകപ്പിനുമായി പാകിസ്ഥാന്‍ ഇന്ത്യയിലേക്ക് യാത്ര നടത്തിയിരുന്നു.
