ഈ മാസം അവസാനത്തോടെ പാകിസ്ഥാന് ക്രിക്കറ്റ് ബോര്‍ഡ് (പിസിബി) ദേശീയ റെഡ്, വൈറ്റ് ബോള്‍ ക്രിക്കറ്റ് ടീമുകളുടെ മുഖ്യ പരിശീലകരെ പ്രഖ്യാപിക്കുമെന്ന് റിപ്പോര്‍ട്ട്. ഏകദിന ലോകകപ്പിലെ ടീമിന്റെ മോശം പ്രകടനത്തിന് ശേഷം ഗ്രാന്റ് ബ്രാഡ്‌ബേണ്‍ സ്ഥാനമൊഴിഞ്ഞതിന് ശേഷം പാകിസ്ഥാന് ഒരു പ്രധാന പരിശീലകനില്ല. ഓസ്ട്രേലിയ, ന്യൂസിലന്‍ഡ് പര്യടനത്തിനിടെ മുന്‍ ഓള്‍റൗണ്ടര്‍ മുഹമ്മദ് ഹഫീസായിരുന്നു ഇടക്കാല പരിശീലകന്‍.
മൊഹ്സിന്‍ നഖ്വിയുടെ നേതൃത്വത്തിലുള്ള പുതിയ പിസിബി കമ്മിറ്റി ന്യൂസിലന്‍ഡിനെതിരായ ടി20 ഐ പരമ്പര ആരംഭിക്കുന്നതിന് മുമ്പ് മുഖ്യ പരിശീലകരെ പ്രഖ്യാപിക്കുമെന്ന് പ്രതീക്ഷിച്ചിരുന്നു. എന്നിരുന്നാലും, പേരുകള്‍ അന്തിമമാക്കുന്നതിന് മുമ്പ് പിസിബിക്ക് കുറച്ച് സമയംകൂടി അധികം ആവശ്യമാണ്.
റിപ്പോര്‍ട്ടുകള്‍ പ്രകാരം മുന്‍ ഇന്ത്യന്‍ ഹെഡ് കോച്ച് ഗാരി കിര്‍സ്റ്റണും മുന്‍ ഓസ്ട്രേലിയന്‍ പേസര്‍ ജേസണ്‍ ഗില്ലസ്പിയും ഈ സ്ഥാനത്തേക്ക് അപേക്ഷിച്ചിട്ടുണ്ട്. ഈ മാസം ആദ്യം മറ്റ് രണ്ട് പ്രശസ്ത കോച്ചുകളില്‍ നിന്ന് പിസിബിക്ക് അപേക്ഷകള്‍ ലഭിച്ചിട്ടുണ്ട്. കിര്‍സ്റ്റണിലും ഗില്ലസ്പിയിലും ബോര്‍ഡിന് താല്‍പ്പര്യമുണ്ടെങ്കിലും പുതിയ അപേക്ഷകരുമായി അവര്‍ മത്സരത്തിലാണെന്ന് പിസിബി ഉദ്യോഗസ്ഥന്‍ പറഞ്ഞു. ഇന്ത്യ 2011 ല്‍ ലോകകപ്പ് കിരീടം ചൂടിയപ്പോള്‍ ഗാരി കിര്‍സ്റ്റണായിരുന്നു പരിശീലകന്‍.
‘കിര്‍സ്റ്റണിന്റെയും ഗില്ലസ്പിയുടെയും കാര്യത്തില്‍, ബോര്‍ഡ് അവരുമായി നേരിട്ട് ചര്‍ച്ചകള്‍ നടത്തിയിട്ടുണ്ട്. പ്രധാന പരിശീലകരായി നിയമിക്കുന്നതിനുള്ള മികച്ച സ്ഥാനാര്‍ത്ഥികളായി അവര്‍ തുടരുന്നു. എന്നാല്‍ സമയപരിധിക്കുള്ളില്‍ ഉചിതമായ നടപടിക്രമങ്ങളിലൂടെ അപേക്ഷിക്കാന്‍ അവരോട് പറഞ്ഞിട്ടുണ്ട്’ പിസിബി ഉദ്യോഗസ്ഥന്‍ പറഞ്ഞു.
കോച്ചുകളുടെ ദീര്‍ഘകാല നിയമനങ്ങള്‍ കൃത്യമായ നടപടിക്രമങ്ങളിലൂടെയായിരിക്കുമെന്നും എല്ലാ പ്രതിബദ്ധതകളും ബോര്‍ഡ് നിറവേറ്റുമെന്നും പിസിബി ചെയര്‍മാന്‍ മൊഹ്സിന്‍ നഖ്വി വ്യക്തമാക്കി.