ലോകോത്തര ബാറ്റ്‌സ്മാന്‍മാരുടെ പേടിസ്വപ്‌നമായിരുന്നു ഒരു കാലത്ത് ഷൊയ്ബ് അക്തര്‍. റാവല്‍പിണ്ടി എക്‌സ്പ്രസ് എന്ന് വിളിപ്പേരുള്ള പാകിസ്ഥാന്‍ പേസ് ബോളിംഗ് ഇതിഹാസം സാക്ഷാല്‍ സച്ചിന്‍ ടെണ്ടുല്‍ക്കറിന്റെയും ബ്രയാന്‍ ലാറയുടേയുമെല്ലാം ബഹുമാനത്തിന് അര്‍ഹനായിട്ടുണ്ട്. ഇന്ത്യയുമായുള്ള മത്സരങ്ങളില്‍ വാശിയോടെ പന്തെറിയുന്ന അക്തര്‍ കളത്തിന് പുറത്ത് വളരെ വലിയ സൗഹൃദ വലയത്തിന് ഉടമയാണ്. ഇന്ത്യയുമായി അടുപ്പം കാത്തുസൂക്ഷിക്കുന്ന അക്തര്‍ ബോളിവുഡ് സൂപ്പര്‍ താരങ്ങളായ ഷാരൂഖ് ഖാനുമായും സല്‍മാന്‍ ഖാനുമായുള്ള ആത്മബന്ധം വെളിപ്പെടുത്തുന്നു.
മുംബൈയിലെ ആള്‍ക്കാരുമായി ഇടപഴകുന്നത് ഞാന്‍ ഇഷ്ടപ്പെട്ടിരുന്നു. ഇളയ സഹോദരനോടുള്ള കരുതലാണ് സല്‍മാനും ഷാരൂഖും എന്നോട്ട് കാട്ടിയിട്ടുള്ളത്. അവരുടെ കുടുംബങ്ങള്‍ക്കും സൗഹൃദക്കൂട്ടായ്മകള്‍ക്കുമൊപ്പം എപ്പോഴെല്ലാം ചേരുമോ അപ്പോഴെല്ലാം എന്റെ സുരക്ഷിതത്വം സല്‍മാനും ഷാരൂഖ് ഉറപ്പാക്കും- അക്തര്‍ പറഞ്ഞു.
നിര്‍ഭാഗ്യവശാല്‍ കഴിഞ്ഞ അഞ്ച് വര്‍ഷമായി ഇന്ത്യയിലേക്ക് വരാന്‍ സാധിച്ചിട്ടില്ല. ഒരുകാലത്ത് ഇന്ത്യയിലെ ചില സുഹൃത്തുക്കള്‍ ആധാറും റേഷന്‍ കാര്‍ഡുമൊക്കെ എടുക്കാന്‍ എന്നോട് ആവശ്യപ്പെട്ടിട്ടുണ്ട്. പ്രിയപ്പെട്ട ഒരുപാട് ഓര്‍മ്മകള്‍ ഇന്ത്യ എനിക്ക് സമ്മാനിച്ചിട്ടുണ്ട്. ഇന്ത്യ- പാക് ബന്ധം അധികം വൈകാതെ ഊഷ്മളമാകുമെന്നും ഇവിടെയെത്തി ധാരാളം പണം സമ്പാദിക്കാനാകുമെന്നും അക്തര്‍ പ്രത്യാശ പ്രകടിപ്പിച്ചു.