വീണ്ടും ഒരു അഴിച്ചുപണിക്ക് ഒരുങ്ങി പഞ്ചാബ് കിംഗ്സ്. കോച്ച് അനില്‍ കുംബ്ലെയെ ഫ്രാഞ്ചൈസി പുറത്താക്കിയേക്കുമെന്ന റിപ്പോര്‍ട്ടുകള്‍ക്ക് പിന്നാലെ നായകന്‍ മായങ്ക അഗര്‍വാളിനെയും ടീം മാറ്റിയേക്കുമെന്നാണ് വിവരം.
കഴിഞ്ഞ സീസണിലാണ് പിബികെഎസ് മായങ്ക് അഗര്‍വാളിനെ ക്യാപ്റ്റനായി നിയമിച്ചത്. എന്നാല്‍ താരത്തിന് പകരം പുതിയ ക്യാപ്റ്റനെ നിയമിക്കാനൊരുങ്ങുകയാണ്. ജോണി ബെയര്‍‌സ്റ്റോയാണ് പകരക്കാരനായി മുന്നിലുള്ളത്.
ട്രെവര്‍ ബെയ്ലിസ്, ഓയിന്‍ മോര്‍ഗന്‍ എന്നിവരരെ കോച്ചിംഗ് റോളിനായി പഞ്ചാബ് സമീപിച്ചിട്ടുണ്ടെന്നാണ് വിവരം. എന്നാലിതില്‍ സ്ഥിരീകരണം വന്നിട്ടില്ല. മായങ്ക് അഗര്‍വാളിനെ സംബന്ധിച്ചിടത്തോളം, നായകസ്ഥാനം നഷ്ടപ്പെട്ടാലും അദ്ദേഹം ടീമിന്റെ ഭാഗമായി തുടരും. എന്നാല്‍ ഇനി ടീമിനെ നയിക്കില്ല എന്നുമാത്രം.
‘മായങ്ക് നയിക്കാനുള്ള പദ്ധതിയിലില്ല. അദ്ദേഹം ബാറ്റിംഗില്‍ ശ്രദ്ധ കേന്ദ്രീകരിക്കേണ്ടതുണ്ട്. അവന്‍ ഞങ്ങള്‍ക്ക് ഒരു നിര്‍ണായക കളിക്കാരനായിരിക്കും. അനിലിനെ സംബന്ധിച്ചിടത്തോളം, ഞങ്ങള്‍ കുറച്ച് ഓപ്ഷനുകള്‍ ചര്‍ച്ച ചെയ്യുന്നു, പക്ഷേ ഒന്നും ഇതുവരെ യാഥാര്‍ത്ഥ്യമായിട്ടില്ല. നമുക്ക് സമയം ബാക്കിയുണ്ട്. ഞങ്ങള്‍ ശരിയായ സമയത്ത് വിളിക്കും’ ഒരു പഞ്ചാബ് കിംഗ്സ് ഉദ്യോഗസ്ഥന്‍ പറഞ്ഞു.