ഇന്ത്യയ്‌ക്കെതിരായുള്ള ടി20 ടീമിനെ പ്രഖ്യാപിച്ച് വെസ്റ്റിന്‍ഡീസ്. നായകന്‍ കീറോണ്‍ പൊള്ളാര്‍ഡിനു കീഴില്‍ 16 അംഗ ടീമിനെയാണ് വിന്‍ഡീസ് പ്രഖ്യാപിച്ചത്. ഇംഗ്ലണ്ടിനെ വിറപ്പിച്ച അതേ സംഘത്തെ തന്നെയാണ് ഇന്ത്യക്കെതിരെയും വിന്‍ഡീസ് അണിനിരത്തിയിരിക്കുന്നത്.
വിന്‍ഡീസ് ടി20 സ്‌ക്വാഡ്: കീറോണ്‍ പൊള്ളാര്‍ഡ് (ക്യാപ്റ്റന്‍), നിക്കോളാസ് പൂരന്‍, ഫാബിയന്‍ അലെന്‍, ഡാരെന്‍ ബ്രാവോ, റോസ്റ്റണ്‍ ചേസ്, ഷെല്‍ഡണ്‍ കോട്രെല്‍, ഡൊമിനിക്ക് ഡ്രേക്ക്സ്, ജാസണ്‍ ഹോള്‍ഡര്‍, ഷെയ് ഹോപ്പ്, അക്കീല്‍ ഹൊസെയ്ന്‍, ബ്രെന്‍ഡന്‍ കിങ്, കൈല്‍ മയേഴ്സ്, റോമന്‍ പവെല്‍, റൊമാരിയോ ഷെപ്പാര്‍ഡ്, ഒഡെയ്ന്‍ സ്മിത്ത്, ഹെയ്ഡന് വാല്‍ഷ് ജൂനിയര്‍.
നിലവില്‍ നടന്നു കൊണ്ടിരിക്കുന്ന ഇംഗ്ലണ്ടുമായുള്ള ടി20 പരമ്പരയില്‍ ടീം മികച്ച പ്രകടനമാണ് നടത്തുന്നത്. നാലു മല്‍സരങ്ങള്‍ പൂര്‍ത്തിയായപ്പോള്‍ ഇരുടീമുകളും 2-2നു ഒപ്പം നില്‍ക്കുകയാണ്. നിര്‍ണായകമായ അഞ്ചാമത്തെയും അവസാനത്തെയും മല്‍സരം ഇന്നു നടക്കും. ശേഷം വിന്‍ഡീസ് പര്യടനത്തിന് ഇന്ത്യയ്ക്ക് തിരിക്കും.
ഫെബ്രുവരി 16 മുതല്‍ 20 വരെ കൊല്‍ക്കത്തയിലെ ഈഡന്‍ ഗാര്‍ഡന്‍സിലാണ് ടി20 പരമ്പര. ഇതിനു മുമ്പ് മൂന്നു മല്‍സരങ്ങളുടെ ഏകദിന പരമ്പരയിലും ഇരുടീമുകളും കൊമ്പുകോര്‍ക്കും. ഫെബ്രുവരി ആറിനാണ് ഏകദിന പരമ്പരയ്ക്കു തുടക്കമാവുന്നത്. ഏകദിനത്തിനു ആതിഥേയത്വം വഹിക്കുന്നത് അഹമ്മദാബാദിലെ നരേന്ദന്ദ്ര മോദി സ്റ്റേഡിയമാണ്.