ഇന്ത്യക്കെതിരായ ബോര്‍ഡര്‍-ഗവാസ്‌കര്‍ പരമ്പരയില്‍ ഏതു തരത്തിലുള്ള പിച്ചാണ് ആഗ്രഹിക്കുന്നതെന്നു വെളിപ്പെടുത്തി ഓസ്ട്രേലിയന്‍ ക്യാപ്റ്റനും സ്റ്റാര്‍ പേസറുമായ പാറ്റ് കമ്മിന്‍സ്. ഇന്ത്യയുമായുള്ള ടെസ്റ്റ് പരമ്പരയില്‍ ഏതു തരത്തിലുള്ള പിച്ചാണ് കാണാന്‍ ആഗ്രഹിക്കുന്നതെന്ന ആങ്കറുടെ ചോദ്യത്തോട് രസകരമായാണ് കമ്മിന്‍സ് പ്രതികരിച്ചത്.
ടെസ്റ്റ് പരമ്പരയ്ക്കായി പിച്ച് തയ്യാറാക്കാന്‍ എനിക്കു അവസരം ലഭിക്കുകയാണെങ്കില്‍ നിങ്ങള്‍ക്കു പിന്നിലുള്ള ബുഷിനു സമാനമായ പിച്ചാണ് കാണാന്‍ ആഗ്രഹിക്കുന്നതെന്നായിരുന്നു ചിരിയോടെയുള്ള കമ്മിന്‍സിന്റെ മറുപടി.
നിര്‍ഭാഗ്യവശാല്‍ പിച്ചിന്റെ കാര്യത്തില്‍ എനിക്കൊന്നും പറയാന്‍ സാധിക്കില്ല. ഏതു തരത്തിലുള്ള പിച്ചാണ് ലഭിക്കുകയെന്നു നമുക്കു കാത്തിരുന്നു കാണാം. കഴിഞ്ഞ കുറച്ചു സീസണുകളായി ഇവിടുത്തെ പിച്ച് വളരെ മികച്ചതായിരുന്നു. എന്നാല്‍ എന്റെ കരിയറിലെ ആദ്യത്തെ കുറച്ചു വര്‍ഷങ്ങളില്‍ ഇവിടെയുള്ള പിച്ച് വളരെയധികം ഫ്ളാറ്റായിരുന്നു- കമ്മിന്‍സ് വ്യക്തമാക്കി.
ഓസ്ട്രേലിയന്‍ മണ്ണില്‍ തുടര്‍ച്ചയായി മൂന്നാം തവണയും പരമ്പര നേടുകയെന്ന ലക്ഷ്യത്തോടെയാണ് ടീം ഇന്ത്യയിറങ്ങുന്നത്. 2018-19, 2020-21 സീസണുകളില്‍ ഇന്ത്യക്കായിരുന്നു പരമ്പര വിജയം. എന്നാല്‍ ഇത്തവണ ടെസ്റ്റുകളുടെ എണ്ണം അഞ്ചാക്കി ഉയര്‍ത്തിയത് ഇന്ത്യക്കു വെല്ലുവിളിയാണ്.