വിരാട് കോഹ്‌ലിക്കെതിരേ പന്തെറിയാന്‍ ഓസീസ് ബോളര്‍മാര്‍ക്കുള്‍പ്പെടെ ഭയമാണെന്ന് സ്പിന്നര്‍ നഥാന്‍ ലിയോണ്‍. ബോര്‍ഡര്‍-ഗവാസ്‌കര്‍ ട്രോഫി അടുത്തുവരെവെയാണ് ലിയോണിന്‍രെ തുറന്നുപറച്ചില്‍. കോഹ്‌ലിയുടെ വിക്കറ്റ് നേടിയാല്‍ ആ ബോളര്‍ ഏറ്റവും വെറുക്കപ്പെട്ട ക്രിക്കറ്റ് താരമായിമാറുന്ന രീതിയാണ് നിലനില്‍ക്കുന്നതെന്നും ലിയോണ്‍ പറയുന്നു.
വിരാട് കോഹ്‌ലിക്കെതിരേ പന്തെറിയുമ്പോള്‍ ഒരു രാജ്യം തന്നെ നിങ്ങള്‍ക്കെിരേ നില്‍ക്കുന്നതായാവും ബോളര്‍ക്ക് തോന്നുക. കോഹ്‌ലിയുടെ വിക്കറ്റ് നേടുകയോ പ്രയാസപ്പെടുത്തുന്ന രീതിയില്‍ പന്തെറിയുകയോ ചെയ്താല്‍ ഏറ്റവും വെറുക്കപ്പെട്ട ക്രിക്കറ്റ് താരമായി ആ ബോളര്‍ മാറും.
സച്ചിന്‍ ടെണ്ടുല്‍ക്കറെ പണ്ട് ഇത്തരത്തില്‍ പ്രയാസപ്പെടുത്തിയപ്പോള്‍ ഇത്തരമൊരു അനുഭവം എനിക്ക് നേരിടേണ്ടി വന്നിരുന്നു. കോഹ്‌ലി സൂപ്പര്‍ സ്റ്റാറാണ്. ഏറെ നാളുകളായി ലോകത്തിലെ മികച്ചവന്മാരിലൊരാളാണ് കോഹ്‌ലി. സ്ഥിരതയോടെ ഏറെ നാളുകളായി മികച്ച പ്രകടനം നടത്താന്‍ അവനാകുന്നു.
കോഹ്‌ലിക്കെതിരേ പന്തെറിയുന്നതിനെ വലിയ അംഗീകാരമായാണ് കാണുന്നത്. എപ്പോഴും ലോകത്തിലെ മികച്ചവനെതിരേ കളിക്കാനാണ് എനിക്കിഷ്ടം. കോഹ്‌ലി എല്ലാവര്‍ക്കും വലിയ വെല്ലുവിളി നല്‍കുന്ന ബാറ്റ്സ്മാനാണ്- ലിയോണ്‍ പറഞ്ഞു.