ഇന്ത്യൻ പ്രീമിയർ ലീഗിലെ പ്രധാന കളിക്കാരാണ് ഇന്ത്യൻ താരങ്ങളായ കെ എൽ രാഹുലും, റിഷഭ് പന്തും. ഇപ്പോൾ നടക്കുന്ന ഐപിഎൽ മെഗാ താരലേലത്തിൽ ഇരുവർക്കും വാൻ തുകയാണ് ലഭിച്ചിരിക്കുന്നത്. ഐപിഎൽ ചരിത്രത്തിലെ തന്നെ ഏറ്റവും വലിയ തുകയ്ക്കാണ് ഇന്ത്യൻ വിക്കറ്റ് കീപ്പറായ റിഷഭ് പന്തിനെ ലക്‌നൗ സൂപ്പർ ജയന്റ്സ് സ്വന്തമാക്കിയത്. 27 കോടി രൂപയാണ് താരത്തിന്റെ വില. കൂടാതെ കെ എൽ രാഹുലിനെ 14 കോടി രൂപയ്ക്കുമാണ് ഡൽഹി ക്യാപിറ്റൽസ് സ്വന്തമാക്കിയത്.
ഇന്ത്യൻ പ്രീമിയർ ലീഗിൽ 2024-25ലേക്കുള്ള മെഗാ താരലേലം സൗദിയിൽ നടന്നു വരികയാണ്. പ്രതീക്ഷിച്ചത് പോലെ തന്നെ സൂപ്പർ താരങ്ങൾക്ക് വേണ്ടി വമ്പൻ വിളിയാണ് എല്ലാ ടീമുകളുടെയും ഭാഗത്ത് നിന്ന് ഉണ്ടാകുന്നത്. ലേലത്തിന്റെ ആദ്യ മണിക്കൂറിൽ പ്രതീക്ഷിച്ചത് പോലെ തന്നെ മാർക്ക്യു താരങ്ങൾക്ക് അടക്കം വമ്പൻ ഡിമാൻഡ് ആയിരുന്നു ഉണ്ടായിരുന്നത്.
ഡൽഹി ക്യാപിറ്റൽസിൽ നിന്നും അഭിപ്രായ ഭിന്നത ഉള്ളത് കൊണ്ടും താരം നിർദേശിച്ച കാര്യങ്ങൾ മാനേജ്‌മെന്റിന് അംഗീകരിക്കാൻ സാധിക്കാത്തത് കൊണ്ടും ഇത്തവണത്തെ റീടെൻഷനിൽ ഡൽഹി പന്തിനെ നിലനിർത്തിയിരുന്നില്ല. കുറച്ച് നാൾ മുന്നേ പന്തിനെ റീറ്റെയിൻ ചെയ്യും എന്ന തീരുമാനത്തിൽ ഉറച്ച് നിന്നെങ്കിലും അവസാനം അവർ താരത്തെ വിട്ടു. അങ്ങനെയാണ് റിഷഭ് മെഗാ താരലേലത്തിൽ പങ്കെടുത്തത്.
കെ എൽ രാഹുലും ലക്‌നൗ സൂപ്പർ ജയന്റ്സ് മാനേജ്‍മെന്റും തമ്മിലുള്ള പ്രശ്നങ്ങൾ നാളുകൾക്ക് മുൻപേ ചർച്ചയായ വിഷയമായിരുന്നു. ഈ വർഷം നടന്ന ഐപിഎലിൽ ടീമിന് വേണ്ടി ഏറ്റവും കൂടുതൽ റൺസ് നേടിയിട്ടും മത്സര ശേഷം ടീം ഉടമ രാഹുലുമായി തർക്കത്തിൽ ഏർപ്പെട്ടു. ഇതോടെ താരത്തെ ടീമിൽ നിലനിർത്തില്ല എന്നും രാഹുൽ സ്വന്തം റെക്കോഡുകൾക്ക് വേണ്ടി കളിക്കുകയാണെന്നും ടീം മാനേജ്‌മന്റ് അറിയിച്ചു. റിഷഭ് പന്തും കെ എൽ രാഹുലും അങ്ങോട്ടും ഇങ്ങോട്ടും പരസ്പരം ടീമുകളെ മാറിയിരിക്കുകയാണ്. അടുത്ത ഐപിഎലിൽ എന്താകും അവസ്ഥ എന്ന് കാത്തിരുന്ന് കാണാം.