ഈ വര്‍ഷം വെസ്റ്റ് ഇന്‍ഡീസിലും അമേരിക്കയിലുമായി നടക്കാനിരിക്കുന്ന ടി20 ലോകകപ്പ് ടൂര്‍ണമെന്റില്‍ രോഹിത് ശര്‍മ്മ ഇന്ത്യന്‍ ടീമിനെ നയിക്കുമെന്ന് ബിസിസിഐ സെക്രട്ടറി ജയ് ഷാ പറഞ്ഞു. രോഹിത് തന്നെ ഇന്ത്യന്‍ ടീമിനെ നയിക്കുമെന്നും കിരീടം ചൂടുമെന്നും രാജ്കോട്ടിലെ നിരഞ്ജന്‍ ഷാ സ്റ്റേഡിയത്തില്‍ നടന്ന പരിപാടിയില്‍ സംസാരിക്കവെ ജയ് ഷാ പറഞ്ഞു.
2023 ഏകദിന ലോകകപ്പിന്റെ ഫൈനലില്‍ ഞങ്ങള്‍ പരാജയപ്പെട്ടിരിക്കാം, പക്ഷേ തുടര്‍ച്ചയായി 10 മത്സരങ്ങള്‍ വിജയിച്ച് ഞങ്ങള്‍ അവിടെ ഹൃദയം കീഴടക്കി. ബാര്‍ബഡോസില്‍ രോഹിത് ശര്‍മ്മയുടെ ക്യാപ്റ്റന്‍സിയില്‍ ഇന്ത്യ 2024 ടി20 ലോകകപ്പ് ഉയര്‍ത്തുമെന്ന് എനിക്ക് ഉറപ്പുണ്ട്- ജയ് ഷാ കൂട്ടിച്ചേര്‍ത്തു.
ജയ് ഷായുടെ ഈ പ്രഖ്യാപനത്തോടെ ഹാര്‍ദിക് പാണ്ഡ്യ ടി20 ലോകകപ്പില്‍ ഇന്ത്യയെ നയിക്കുമൊ എന്നുള്ള ചോദ്യങ്ങള്‍ക്ക് അവസാനമായിരിക്കുകയാണ്.
2022 ല്‍ ഓസ്ട്രേലിയയില്‍ നടന്ന ടി20 ലോകകപ്പിന്റെ അവസാന പതിപ്പിന് ശേഷം മൂന്ന് ടി20 മത്സരങ്ങളില്‍ മാത്രമേ രോഹിത് കളിച്ചിട്ടുള്ളൂ.
രോഹിതിന്റെ അഭാവത്തില്‍ ഇന്ത്യന്‍ ടി20 ടീമിനെ പാണ്ഡ്യ ആണ് നയിച്ചു പോന്നിരുന്നത്. നിലവില്‍ താരം പരിക്കേറ്റ് ടീമിന് പുറത്താണ്.