വിരാട് കോഹ്ലിയും രോഹിത് ശര്‍മ്മയും ക്യാപ്റ്റന്‍മാരായിരുന്നപ്പോഴും രവി ശാസ്ത്രി, രാഹുല്‍ ദ്രാവിഡ്, ഗൗതം ഗംഭീര്‍ എന്നിവര്‍ മുഖ്യപരിശീലകരായിരുന്നപ്പോഴും രവിചന്ദ്രന്‍ അശ്വിനെ വിദേശ ടെസ്റ്റ് മത്സരങ്ങളില്‍ ബെഞ്ചില്‍ ഇരുത്തി. ഇതിഹാസ ക്രിക്കറ്റ് താരം അന്താരാഷ്ട്ര ക്രിക്കറ്റില്‍ നിന്ന് വിരമിക്കല്‍ പ്രഖ്യാപിച്ചതിന് പിന്നാലെ അശ്വിന്റെ പിതാവ് ഇത് ചൂണ്ടിക്കാട്ടി ടീം മാനേജ്‌മെന്റിനെതിരെ വിമര്‍ശനം ഉയര്‍ത്തി.
ഇപ്പോഴിതാ മികച്ച ടീം കോമ്പിനേഷനായി അശ്വിനെ പ്ലെയിംഗ് ഇലവനില്‍ നിന്ന് ഒഴിവാക്കിയതിന് ടീം മാനേജ്മെന്റിനെ രൂക്ഷമായി വിമര്‍ശിച്ച് രംഗത്തുവന്നിരിക്കുകയാണ് മുന്‍ താരം സുനില്‍ ഗവാസ്‌കര്‍. അദ്ദേഹം ആരുടെയും പേരുകള്‍ എടുത്ത് പറഞ്ഞില്ലെങ്കിലും ഓസ്ട്രേലിയ, ഇംഗ്ലണ്ട്, ദക്ഷിണാഫ്രിക്ക, ന്യൂസിലന്‍ഡ് എന്നിവിടങ്ങളില്‍ ഇന്ത്യ കളിച്ചപ്പോള്‍ അശ്വിന് കഠിനമായ സമയങ്ങളിലൂടെ കടന്നുപോകേണ്ടിവന്നുവെന്ന് പരാമര്‍ശിച്ചു.
ക്രിക്കറ്റ് ഒരു ബാറ്റേഴ്സ് ഗെയിമാണ്. പ്ലെയര്‍ ഓഫ് ദി സീരീസ് അവാര്‍ഡുകള്‍ നേടിയിട്ടും അശ്വിനെ അര്‍ഹിക്കുന്നതുപോലെ പരിഗണിക്കുകയോ അഭിന്ദിക്കുകയോ ചെയ്തില്ല. അദ്ദേഹത്തെ ഇലവനില്‍നിന്ന് പുറത്താക്കാന്‍ ടീം മാനേജ്മെന്റിന് അഞ്ച് ശതമാനം ഒഴികഴിവ് ഉണ്ടായിരുന്നെങ്കിലും, ടീം ബാലന്‍സ് നിലനിര്‍ത്തുന്നതിന് വേണ്ടിയാണ് അത് ചെയ്തു.
അശ്വിന് ഇല്ലാതെ ഇന്ത്യക്ക് മത്സരങ്ങള്‍ ജയിക്കാന്‍ കഴിയില്ലെന്ന് മാനേജ്മെന്റിന് അറിയാമായിരുന്നതിനാല്‍ അശ്വിന് സ്വന്തം തട്ടകത്തില്‍ പകരം വയ്ക്കാനില്ലാത്തവനായിരുന്നു. സെന രാജ്യങ്ങളില്‍ പിച്ചിന്റെ സ്വഭാവവും മറ്റും അദ്ദേഹത്തെ ഒഴിവാക്കാന്‍ ചൂണ്ടിക്കാട്ടപ്പെട്ടെങ്കില്‍ എന്തുകൊണ്ടത് ബാറ്റര്‍മാരുടെ കാര്യത്തില്‍ ബാധകമായില്ല- ഗവാസ്‌കര്‍ ചോദിച്ചു
കഴിഞ്ഞ 14 വര്‍ഷത്തിനിടെ 26 മത്സരങ്ങള്‍ മാത്രമാണ് അശ്വിന് സെന രാജ്യങ്ങളില്‍ കളിച്ചത്. അന്താരാഷ്ട്ര ക്രിക്കറ്റില്‍ വിവിധ ഫോര്‍മാറ്റുകളിലായി 765 വിക്കറ്റുകള്‍ അശ്വിന് നേടിയപ്പോള്‍ ടെസ്റ്റ് ക്രിക്കറ്റിലാണ് 537 വിക്കറ്റുകളും അശ്വിന് നേടിയത്. കരിയറില്‍ 11 തവണ പ്ലെയര്‍ ഓഫ് ദി സീരീസ് അവാര്‍ഡും താരം നേടി.