വനിതാ പ്രീമിയര്‍ ലീഗിന്റെ (ഡബ്ല്യുപിഎല്‍) ഉദ്ഘാടന പതിപ്പിനുള്ള കളിക്കാരുടെ ലേലം ഫെബ്രുവരി 13ന് മുംബൈയില്‍ നടക്കും. കഴിഞ്ഞ ദിവസം അഹമ്മദാബാദില്‍ നടന്ന ഇന്ത്യ-ന്യൂസിലാന്‍ഡ് മൂന്നാം ടി20യില്‍ പങ്കെടുത്ത ഒരു ഉന്നത ബിസിസിഐ ഉദ്യോഗസ്ഥന്‍ ഇക്കാര്യം സ്ഥിരീകരിച്ചു.
‘ഫെബ്രുവരി 13-ന് മുംബൈയില്‍ ലേലം നടക്കും. തിയതിയും സ്ഥലവും ഫ്രാഞ്ചൈസികള്‍ക്ക് സൗകര്യപ്രദമാണ്. കൂടാതെ മുംബൈയില്‍ ലേലം ക്രമീകരിക്കുന്നത് ബിസിസിഐക്കും എളുപ്പമാണ്. ഔദ്യോഗിക പ്രഖ്യാപനങ്ങള്‍ ഉടന്‍ ഉണ്ടാകും’ ബിസിസിഐ ഉന്നത ഉദ്യോഗസ്ഥന്‍ പറഞ്ഞു.
സൗത്ത് മുംബൈയിലെ ഒരു ഹോട്ടലിലാണ് ലേലം നടക്കുന്നത്. ലേലത്തിന്റെ തിയതിയും സ്ഥലവും സംബന്ധിച്ച് അഞ്ച് ഫ്രാഞ്ചൈസികളെ ഇതുവരെ ഔദ്യോഗികമായി അറിയിച്ചിട്ടില്ല. എന്നിരുന്നാലും ഒരു ദിവസം നീണ്ടുനില്‍ക്കുന്ന ഇവന്റിനുള്ള തയ്യാറെടുപ്പ് ആരംഭിക്കാനും അതനുസരിച്ച് യാത്രാ പദ്ധതികള്‍ തയ്യാറാക്കാനും അനൗപചാരികമായി ആവശ്യപ്പെട്ടിട്ടുണ്ടെന്നാണ് വിവരം.
ലേലത്തിനുള്ള ഒരുക്കങ്ങള്‍ പുരോഗമിക്കുകയാണെന്ന് ഫ്രാഞ്ചൈസികളിലൊന്നിലെ മുതിര്‍ന്ന ഉദ്യോഗസ്ഥര്‍ അറിയിച്ചു. ആദ്യ സീസണിന്റെ തീയതി ബിസിസിഐ ഇതുവരെ ഔദ്യോഗികമായി പ്രഖ്യാപിച്ചിട്ടില്ല. എന്നാല്‍ മാര്‍ച്ച് 4 മുതല്‍ ഉദ്ഘാടന സീസണ്‍ ആരംഭിക്കുമെന്നാണ് ബിസിസിഐ ആസ്ഥാനത്ത് നിന്നുള്ള സൂചന. മാര്‍ച്ച് 24 നായിരിക്കും ഈ സീസണിന്റെ ഫൈനല്‍ മത്സരം.