മെല്‍ബണില്‍ നടന്ന നാലാം ടെസ്റ്റില്‍ ഓസ്ട്രേലിയയ്ക്കെതിരായ 184 റണ്‍സിന്റെ തോല്‍വി ഇന്ത്യയുടെ ലോക ടെസ്റ്റ് ചാമ്പ്യന്‍ഷിപ്പ് (WTC) 2023/25 ഫൈനല്‍ പ്രതീക്ഷകള്‍ക്ക് മങ്ങലേല്‍പ്പിച്ചിരിക്കുകയാണ്. കിരീടപ്പോരാട്ടത്തില്‍ ദക്ഷിണാഫ്രിക്ക ഇതിനകം തന്നെ ഫൈനലില്‍ സ്ഥാനം ഉറപ്പിച്ചതോടെ, രണ്ടാം സ്ഥാനത്തിനായുള്ള ഓസ്ട്രേലിയയും ഇന്ത്യയും തമ്മിലുള്ള മത്സരം കൂടുതല്‍ ശക്തമായി. ഈ പോരാട്ടത്തില്‍ ഓസ്ട്രേലിയ ലക്ഷ്യത്തോട് കുറേക്കൂടി അടുക്കുകയും ഇന്ത്യ അകലുകയും ചെയ്തു.
തോല്‍വിക്ക് ശേഷം 52.78 പിസിടിയുമായി ഇന്ത്യ ഡബ്ല്യുടിസി സ്റ്റാന്‍ഡിംഗില്‍ മൂന്നാം സ്ഥാനത്തും 61.46% മായി ഓസ്ട്രേലിയ രണ്ടാം സ്ഥാനത്തുമാണ്. 2025 ജനുവരി 3-ന് ആരംഭിക്കുന്ന സിഡ്നി ക്രിക്കറ്റ് ഗ്രൗണ്ടിലാണ് ഇന്ത്യ ഈ സൈക്കിളിലെ അവസാന മത്സരം കളിക്കുന്നത്. ഓസ്ട്രേലിയയ്ക്ക് ശ്രീലങ്കയ്ക്കെതിരെ രണ്ട് മത്സരങ്ങള്‍ ശേഷിക്കുന്നുണ്ട്.
തങ്ങളുടെ സാധ്യതകള്‍ നിലനിര്‍ത്താന്‍, രോഹിത് ശര്‍മ്മയുടെ നേതൃത്വത്തിലുള്ള ടീമിന് സിഡ്നി ടെസ്റ്റ് ജയിച്ച് ബോര്‍ഡര്‍-ഗവാസ്കര് ട്രോഫി പരമ്പര 2-2 ന് സമനിലയിലാക്കണം. ഈ ഫലം അവരുടെ വിജയശതമാനം 55.26 ആക്കും. എന്നിരുന്നാലും, ശ്രീലങ്ക അവരുടെ വരാനിരിക്കുന്ന പരമ്പരയില്‍ ഓസ്ട്രേലിയയെ 2-0 അല്ലെങ്കില്‍ 1-0 ന് പരാജയപ്പെടുത്തിയില്ലെങ്കില്‍ സിഡ്നിയിലെ വിജയം ഇന്ത്യയെ സഹായിക്കില്ല. ശ്രീലങ്കയ്ക്കെതിരായ മത്സരത്തില്‍ ഓസ്ട്രേലിയ ജയിക്കുകയോ സമനിലയിലാവുകയോ ചെയ്താല്‍, അവര്‍ പോയിന്റ് പട്ടികയില്‍ ഇന്ത്യയേക്കാള്‍ മുന്നില്‍ തുടരും.
സിഡ്നിയില്‍ തോല്‍വിയോ സമനിലയോ ആയാല്‍ ഇന്ത്യ പുറത്താകും. ഓസ്ട്രേലിയ പരമ്പര 3-1 ന് ജയിച്ചാല്‍, അവരുടെ വിജയ ശതമാനം 63.73 ആയി ഉയരും. അതേസമയം ഇന്ത്യയുചേത് 50.00% ആയി കുറയും. ഇത് അവരുടെ WTC കാമ്പെയ്ന്‍ അവസാനിപ്പിക്കും.