പാകിസ്ഥാന്‍ ക്രിക്കറ്റ് താരം അബ്ദുല്ല ഷഫീഖിനെതിരെ രൂക്ഷവിമര്‍ശനവുമായി പാക് ഇതിഹാസ താരം വസീം അക്രം. പാകിസ്ഥാന്‍ സൂപ്പര്‍ ലീഗില്‍ ലഹോര്‍ ക്വാലാന്‍ഡേഴ്‌സും ഇസ്‌ലാമബാദ് യുണൈറ്റഡും തമ്മിലുള്ള മത്സരത്തിനിടെ ക്യാച്ചെടുത്ത താരത്തിന്റെ അതിരുവിട്ട ആഘോഷ പ്രകടനമാണ് അക്രത്തെ ചാടിപ്പിച്ചത്.
ഒരു സംശയവുമില്ല അതു നല്ല ക്യാച്ചായിരുന്നു. പക്ഷേ ഓസ്‌ട്രേലിയയ്‌ക്കെതിരായ ടെസ്റ്റ് പരമ്പരയിലെ 36 ക്യാച്ചുകള്‍ പാഴാക്കിയതിന് ആരാണ് ഉത്തരവാദി? അതിന് ആരാണു മറുപടി പറയുക? അബ്ദുല്ല ഷഫീഖ് ക്രിക്കറ്റില്‍ പ്രവര്‍ത്തിക്കുന്നതിനേക്കാളും നാടകത്തില്‍ ചേരുന്നതാണു നല്ലത്- വസിം അക്രം പറഞ്ഞു.
അക്രത്തിന്റെ വാക്കുകളോട് പ്രതികരിച്ച് ഷഫീഖ് രംഗത്തുവന്നു. അത് അദ്ദേഹത്തിന്റെ നിലപാടാണ്. അദ്ദേഹം ക്രിക്കറ്റ് കളിച്ചിട്ടുള്ള ആളാണ്. അതുകൊണ്ടു തന്നെ കാര്യങ്ങള്‍ നന്നായി മനസ്സിലാക്കാന്‍ സാധിക്കും. ഒന്നും ആലോചിച്ചിട്ടല്ല അങ്ങനെ ആഘോഷിച്ചത്. മത്സരത്തിന്റെ വാശിയേറിയ സാഹചര്യത്തില്‍ അതു സംഭവിച്ചുപോയതാണ്- താരം പറഞ്ഞു.
അബ്ദുല്ല ഷഫീഖിനെതിരെ അടുത്തിടെ ഉയര്‍ന്നുവന്ന വിമര്‍ശനങ്ങള്‍ക്കു മറുപടിയെന്നോളം വിരല്‍ ചുണ്ടത്തുവച്ചായിരുന്നു താരം ക്യാച്ച് ആഘോഷിച്ചത്.