ക്രിക്കറ്റ് താരങ്ങള്‍ പേടിക്കുന്ന ട്രോളനാണ് യുസ്വേന്ദ്ര ചഹല്‍. താരങ്ങള്‍ സോഷ്യല്‍ പോസ്റ്റ് ചെയ്യുന്ന ഫോട്ടോകള്‍ക്കും വീഡിയോകള്‍ക്കും താഴെ ചഹല്‍ താരങ്ങളെ രസകരമായ രീതിയില്‍ ട്രോളുന്നതും ഈ ട്രോള് വൈറല്‍ ആകുന്നതും സ്ഥിരം കാഴ്ചയാണ്. അടുത്തിടെ താരത്തിന്റെ ട്രോളിന് ഇരയായത് മുന്‍ ഇന്ത്യന്‍ താരം ആകാശ് ചോപ്രയാണ്.
ഇന്നലെ നടന്ന ചെന്നൈ-പഞ്ചാബ് ഐ.പി.എല്‍ മത്സരത്തില്‍ തുടക്കത്തിലെ ബാറ്റിംഗ് തകര്‍ച്ചക്ക് ശേഷം പഞ്ചാബിന് രക്ഷയായത് ഇംഗ്ലിഷ് ഓള്‍റൗണ്ടര്‍ ലിയാം ലിവിങ്സ്റ്റന്‍ നടത്തിയ വെടിക്കെട്ട് ബാറ്റിങ്ങാണ്. ചെന്നൈ ബൗളറുമാരെ കണക്കറ്റ് പ്രഹരിച്ച താരത്തിന്റെ ഒരു സിക്‌സര്‍ 108 മീറ്ററാണു പറന്നത്. സീസണില്‍ ഏറ്റവും കൂടുതല്‍ ദൂരം പിന്നിട്ട സിക്‌സും ഇത് തന്നെയായിരുന്നു.
തൊട്ടുപിന്നാലെ തന്റെ ട്വിറ്റെറിലൂടെ ചോപ്ര ‘100 മീറ്റര്‍ മാര്‍ക്ക് പിന്നിടുന്ന സിക്‌സറുകള്‍ക്ക് 6നു പകരം 8 റണ്‍സ് നല്‍കണമെന്ന് കുറിച്ചു’. ആകാശിന്റെ ഈ ട്വീറ്റിന് പിന്നാലെ ആയിരുന്നു യുസിയുടെ ഗൂഗ്ലി. ‘ചേട്ടാ അങ്ങനെയെങ്കില്‍ 3 ഡോട് ബോളുകള്‍ക്ക് ഒരു വിക്കറ്റ് കൂടി അനുവദിച്ചു തരണം.’ ചോപ്രയുടെ ട്വീറ്റിന് ലഭിച്ച ലൈക്ക് ചഹല്‍ നിമിഷനേരം കൊണ്ട് മറികടന്നു.
ചഹലിന്റെ നര്‍മത്തില്‍ ചാലിച്ചുള്ള മറുപടിയെ പുകഴ്ത്തി സുരേഷ് റെയ്‌ന അടക്കമുള്ള താരങ്ങളും ആരാധകരും എത്താന്‍ അധികം വൈകിയില്ല. ബാംഗ്ലൂര്‍ ടീമില്‍ ആയിരുന്നപ്പോള്‍ അവിടുത്തെ ആസ്ഥാന ട്രോളനായിരുന്ന ചഹല്‍ രാജസ്ഥാനില്‍ എത്തിയിട്ടും തന്റെ ട്രോള് സിംഹാസനം ആര്‍ക്കും വിട്ടുകൊടുക്കാതിരിക്കുകയാണ്.