ഫുട്ബോൾ ലോകത്തെ ഏറ്റവും കൂടുതൽ ആരാധകർ കാത്തിരിക്കുന്ന മത്സരത്തിന്റെ പേരാണ് എൽ ക്ലാസിക്കോ. സ്പാനിഷ് സൂപ്പർ ടീമായ റയൽ മാഡ്രിഡും ബാഴ്സിലോണയും തമ്മിൽ ഏറ്റുമുട്ടുന്ന മത്സരമാണിത്. ഇത്തവണ നടന്ന പ്രീ സീസൺ മത്സരത്തിൽ ബാഴ്സിലോണയും റയൽ മാഡ്രിഡും ഏറ്റുമുട്ടിയിരുന്നു. അതിൽ വിജയിച്ചത് ബാഴ്‌സ തന്നെ ആയിരുന്നു. എന്നാൽ ആദ്യത്തെ ഒഫീഷ്യൽ എൽ ക്ലാസിക്കോ ഒക്ടോബർ 27 ആം തിയതി ആണ് നടക്കുന്നത്.
ഇതിനിടെ ഖത്തർ പ്രവാസികൾക്ക് സന്തോഷ വാർത്ത. എല്ലാ തവണയും നടക്കുന്ന ലെജന്ഡ്സ് എൽ ക്ലാസിക്കോ ഖത്തറിൽ വെച്ച് നടത്താനാണ് നിശ്ചയിച്ചിരിക്കുന്നത്. വിസിറ്റ് ഖത്തറാണ് ഇതിന്റെ സ്പോൺസർഷിപ്പ് ഏറ്റെടുത്തിരിക്കുന്നത്. ഇക്കാര്യത്തിൽ ഒഫീഷ്യൽ പ്രഖ്യാപനം കഴിഞ്ഞ ദിവസം പുറത്തേക്ക് വന്നിട്ടുണ്ട്.
നവംബർ 28 ആം തിയതി ദോഹയിലെ ഖലീഫ ഇന്റർനാഷണൽ സ്റ്റേഡിയത്തിൽ വെച്ചുകൊണ്ടാണ് ഈ മത്സരം നടക്കുക. മത്സരത്തിന്റെ ടിക്കറ്റ് വില്പന ഇത് വരെ ആരംഭിച്ചിട്ടില്ല. ഇത് മൂന്നാമത്തെ തവണയാണ് ലെജന്ഡ്സ് എൽ ക്ലാസിക്കോ അരങ്ങേറുന്നത്. രണ്ട് തവണ ഏറ്റുമുട്ടിയപ്പോൾ ഇരു ടീമുകളും ഓരോ തവണ വീതം വിജയിക്കുകയായിരുന്നു.
2017ൽ ആണ് ആദ്യമായി ലെജന്ഡ്സ് എൽ ക്ലാസിക്കോ മത്സരം നടത്തിയത്. അന്നത്തെ മത്സരത്തിൽ രണ്ടിനെതിരെ മൂന്ന് ഗോളുകൾക്ക് ആണ് അവർ റയലിനെ പരാജയപ്പെടുത്തിയത്. അതിന് ശേഷം നടന്നത് 2021 ഇൽ ആയിരുന്നു. രണ്ടിനെതിരെ മൂന്ന് ഗോളുകൾക്ക് റയൽ വിജയിക്കുകയും ചെയ്തു.
ഏതൊക്കെ താരങ്ങൾ പങ്കെടുക്കും എന്നുള്ളത് വ്യക്തമായിട്ടില്ല. അധികം വൈകാതെ തന്നെ ഇരു ടീമുകളും സ്‌ക്വാഡ് പുറത്തു വിട്ടേക്കും എന്നാണ് റിപ്പോർട്ടുകൾ ചൂണ്ടിക്കാണിക്കുന്നത്. ആരാധകരുടെ പ്രിയപ്പെട്ട താരങ്ങൾ ഉണ്ടാകുമെന്ന് തന്നെയാണ് എല്ലാവരും പ്രതീക്ഷിക്കുന്നത്.