ലോക കായിക ഭൂപടം ഫുട്‍ബോൾ ആവേശത്തിലേക്ക് ചുരുങ്ങുന്ന മണിക്കൂറിനാണ് നമ്മൾ ഇനി സാക്ഷ്യം വഹിക്കാൻ പോകുന്നത്. ആദ്യ മത്സരത്തിൽ ആതിഥേയരായ ഖത്തർ ഇക്വഡോറിനെ നേരിടുന്നതോടെ ആവേശ പൂരത്തിന് തിരിതെളിയും. പൂരത്തിന്റെ അവസാനം പോർവിളികളും പോരാട്ടവും അവസാനിക്കുമ്പോൾ അന്തിമ വിജയിയെ നമുക്ക് അറിയാൻ സാധിക്കും. അര്ജന്റീനക്കും ബ്രസീലിനും ജർമനിക്കും പോർച്ചുഗലിനും തുടങ്ങി കുഞ്ഞൻ ടീമുകൾക്ക് വരെ ആരാധകരുണ്ട് എന്നതാണ് പ്രത്യേകത. ഇപ്പോഴിതാ ഖത്തർ ലോകകപ്പിൽ താൻ പിന്തുണക്കുന്ന ടീമിന്റെ പേര് പറഞ്ഞിരിക്കുകയാണ്ഇന്ത്യൻ സ്പിന്നർ രവിചന്ദ്രൻ അശ്വിൻ.
2022 ഫിഫ ലോകകപ്പ് ഖത്തറിലെ തന്റെ പ്രിയപ്പെട്ട ടീമിനെക്കുറിച്ച് ഇന്ത്യൻ ക്രിക്കറ്റ് താരം രവിചന്ദ്രൻ അശ്വിൻ സ്‌പോർട്‌സ് 18-നോട് സംസാരിച്ചു: “ഞാൻ എല്ലായ്‌പ്പോഴും സ്‌പെയിനിന്റെ ആരാധകനാണ്. ഈ വർഷം അവർ എങ്ങനെ കളിക്കുമെന്ന് എനിക്ക് ഉറപ്പില്ല. പക്ഷെ ഞാൻ അവരുടെ പ്രകടനം കാണാൻ കാത്തിരിക്കുകയാണ്. ടീമുകൾ എല്ലാം നല്ല ഫുട്‍ബോളാണ് കളിക്കുന്നതെന്നതാണ് എന്നെ ആകർഷിച്ച ഏറ്റവും പ്രധാന കാര്യം. കഴിഞ്ഞ തവണ കൈലിയൻ എംബാപ്പെയെ കാണുന്നത് ഞാൻ ആസ്വദിച്ചു, ഈ ലോകകപ്പിലും അവനെ പോലെ ഉള്ള താരങ്ങളുടെ കളി കാണാൻ ഞാൻ കാത്തിരിക്കുകയാണ്.
മുൻ ഇന്ത്യൻ സ്പിന്നർ പ്രഗ്യാൻ ഓജയും തന്റെ സ്വപ്ന ലോകകപ്പ് ഫൈനലിനെക്കുറിച്ച് തന്റെ ചിന്തകൾ പങ്കുവെച്ചു, “അതെ, ഞാൻ 2022 ഫിഫ ലോകകപ്പിനായി ഖത്തറിലേക്ക് പോകുന്നു. ഞാൻ പോർച്ചുഗലും ഉറുഗ്വേയും തമ്മിലുള്ള മത്സരമാണ് കാണാൻ പോകുന്നത്, ഇതിന് പിന്നിലെ ഒരേയൊരു കാരണം ക്രിസ്റ്റ്യാനോ റൊണാൾഡോയാണ്. ഞാൻ അദ്ദേഹത്തിന്റെ വലിയ ആരാധകൻ ഒന്നും അല്ല, പക്ഷെ അയാൾ കളിക്കുന്നത് കാണാൻ ഞാൻ ആഗ്രഹിക്കുന്നു.”
തന്റെ സ്വപ്ന ലോകകപ്പ് ഫൈനലിനെക്കുറിച്ച് ചോദിച്ചപ്പോൾ അദ്ദേഹം പറഞ്ഞു, “നോക്കൂ, എനിക്ക് ഫുട്ബോളിൽ തീരെ താൽപ്പര്യമില്ല, പക്ഷേ അങ്ങനെ തിരഞ്ഞെടുക്കേണ്ടിവന്നാൽ അത് മെസ്സി vs ക്രിസ്റ്റ്യാനോ റൊണാൾഡോ ആയിരിക്കും, അത് അർജന്റീനയും പോർച്ചുഗലും ആയിരിക്കും.”