ഇന്ത്യൻ സൂപ്പർ ലീഗിൽ മോഹൻ ബഗാനെതിരായ ഇന്നലെ നടന്ന മത്സരത്തിൽ കേരള ബ്ലാസ്റ്റേഴ്സിന് തോൽവിയെറ്റ് വാങ്ങേണ്ടതായി വന്നിരുന്നു. കൊച്ചി ജവഹർലാൽ നെഹ്‌റു സ്‌റ്റേഡിയത്തിൽ നടന്ന മത്സരത്തിൽ മൂന്നിനെതിരെ നാല് ഗോളുകൾക്കായിരുന്നു ബഗാന്റെ ജയം. അർമാൻഡോ സാദികുവിന്റെ ഇരട്ട ഗോളാണ് ബഗാന് ജയമൊരുക്കിയത്. ദീപക് തംഗ്രി, ജേസൺ കമ്മിൻസ് എന്നിവർ ഓരോ ഗോൾ നേടി. ബ്ലാസ്റ്റേഴ്സിന് വേണ്ടി ദിമിത്രിയോസ് ഡയമന്റാകോസ് രണ്ട് ഗോൾ നേടി. വിപിൻ മോഹന്റെ വകയായിരുന്നു ബ്ലാസ്‌റ്റേഴ്‌സിന്റെ മറ്റൊരു ഗോൾ.
ജയത്തോടെ പ്ലേ ഓഫ് ഏകദേശം ഉറപ്പിച്ച കൊൽക്കത്ത തങ്ങളുടെ ആരാധകരെ സന്തോഷിപ്പിക്കുമ്പോൾ കൊച്ചിയിൽ തങ്ങൾക്കായി അലറി വിളിച്ച ആരാധകരെ നിരാശപെടുത്തുകയാണ് ചെയ്തത്. ശേഷിക്കുന്ന നാല് മത്സരങ്ങളിൽ 2 എണ്ണം എതിരാളികളുടെ മടയിൽ പോയി കളിക്കുന്ന കേരളത്തിന് അതിൽ രണ്ടെണ്ണം എങ്കിലും ജയിച്ചാൽ മാത്രമേ പ്ലേ ഓഫ് ഉറപ്പിക്കാൻ സാധിക്കു.
തോൽവിക്ക് ഇടയിൽ വളരെ നിരാശപ്പെടുത്തുന്ന വാർത്തയാണ് ബ്ലാസ്‌റ്റേഴ്‌സിനെ സംബന്ധിച്ച് പുറത്തുവരുന്നത്. പ്രിയ പരിശീലകൻ ഇവാൻ വുകോമനോവിച്ച് ഈ സീസൺ അവസാനത്തോടെ ക്ലബ് വിടുമെന്നാണ് റിപ്പോർട്ടുകൾ. ടീമിനെ സംബന്ധിച്ച് ഈ സീസണിൽ ഭേദപ്പെട്ട പ്രകടനം നടത്തുന്നുണ്ടെങ്കിലും ടീമും ആരാധകരും ആഗ്രഹിക്കുന്ന കിരീടം നേടി കൊടുക്കാൻ പറ്റാത്തത് തന്നെയാണ് പുറത്തുപോക്കിന് കാരണമെന്ന് പറയപ്പെടുന്നു.
പരിശീലകന് ഒരുപാട് ഓഫറുകൾ മറ്റ് രാജ്യങ്ങളിൽ നിന്നും വരുന്നുണ്ടെന്നും അതിനാൽ തന്നെ ടീം വിടുമെന്നുമാണ് റിപ്പോർട്ട്. പകരം ബ്ലാസ്റ്റേഴ്‌സ് ഇന്ത്യൻ സൂപ്പർ ലീഗിൽ തന്നെയുള്ള 2 പരിശീലകരുമായി ബ്ലാസ്റ്റേഴ്‌സ് ചർച്ച നടത്തുന്നു എന്നാണ് റിപ്പോർട്ട്.