സൂപ്പര്‍ താരം ലയണല്‍ മെസ്സിയുടെ നിര്‍ദേശങ്ങള്‍ക്കനുസിരിച്ച് ട്രാന്‍സ്ഫര്‍ പദ്ധതികൊളൊരുക്കാന്‍ ബാഴ്‌സലോണ ഒരുങ്ങുന്നു. ഇതുസംബന്ധിച്ച് കാറ്റലന്‍ ക്ലബ്ബിന്റെ പരിശീലകന്‍ ഏണസ്റ്റോ വല്‍വാര്‍ഡേ ജനുവരി ട്രാന്‍സഫറില്‍ തങ്ങള്‍ കൂടുതല്‍ ഇടപെടലുകള്‍ നടത്തുമെന്ന് പ്രഖ്യാപിച്ചു. പകരക്കാരുടെ ബെഞ്ചില്‍ മികച്ച താരങ്ങളില്ല എന്ന പരാതി ബാഴ്‌സ ആരാധകര്‍ക്കിടയില്‍ തന്നെ ഉയര്‍ന്ന സാഹചര്യത്തിലാണ് പുതിയ ട്രാന്‍സ്ഫറുകള്‍ക്ക് ബാഴ്‌സ ഒരുങ്ങുന്നതെന്നാണ് റിപ്പോര്‍ട്ടുകള്‍.
ലിവര്‍പൂളിന്റെ ബ്രസീലിയന്‍ താരം കുട്ടിഞ്ഞോയ്ക്കായി കഴിഞ്ഞ സീസണ്‍ മുതല്‍ വലവിരിച്ച് കാത്തിരിക്കുന്ന ബാഴ്‌സലോണയ്ക്ക് റെഡ്‌സുമായി ഇതുവരെ ഒരു തീരുമാനത്തിലെത്താന്‍ സാധിച്ചിട്ടില്ല. ജനുവരി വിന്‍ഡോയില്‍ ഇക്കാര്യം തീരുമാനത്തിലെത്താന്‍ സാധിക്കുമെന്നാണ് ബാഴ്‌സ കരതുന്നത്. കുട്ടിഞ്ഞോയെ ടീമിലെത്താന്‍ സാധിച്ചില്ലെങ്കില്‍ ഷാല്‍ക്കെയുടെ ജര്‍മന്‍ താരം ലിയോണ്‍ ഗോരെട്‌സകയെ ന്യൂ ക്യാംപിലെത്തിക്കാനുള്ള ബ്ലാന്‍ ബിയാണ് മാനേജ്‌മെന്റിനുള്ളതെന്ന് എക്‌സ്പ്രസ് സ്‌പോര്‍ട്‌സ് റിപ്പോര്‍ട്ട് ചെയ്യുന്നു. മധ്യനിരയില്‍ കളി മെനയുന്ന കാര്യത്തില്‍ 22 കാരനായ ഗോരെട്‌സ്‌ക സാവിക്കും ഇനിയസ്റ്റയ്ക്കും പിന്‍ഗാമിയാകുമെന്നാണ് ആരാധകര്‍ കരുതുന്നത്.
അതേസമയം, താരത്തെ നോട്ടമിട്ട് യൂറോപ്പില്‍ നിന്നുള്ള നിരവധി ക്ലബ്ബുകള്‍ രംഗത്തുണ്ട്. മെസ്സിയ്ക്കും സുവാരസ്സിനും ബോള്‍ എത്തിച്ചു കൊടുക്കേണ്ട ചുമതല മിഡ്ഫീല്‍ഡില്‍ താരം ഭംഗിയായി നിറവേറ്റുമെന്നാണ് കരുതുന്നത്. മിഡ്ഫീല്‍ഡര്‍ എന്ന നിലയില്‍ മാത്രമല്ല ഗോള്‍ സ്‌കോര്‍ ചെയ്യുന്നതിലും വിദഗ്ധനാണ് എന്ന തെളിയിച്ച താരമാണ് ഗോര്‍ട്സ്‌കെ. ബുണ്ടസ് ലീഗില്‍ ഇതുവരെ 8 കളികളില്‍ നിന്നായി 4 ഗോള്‍ സ്വന്തമാക്കിക്കഴിഞ്ഞു താരം.