രക്ഷകനായി ഇയാന്‍ ഹ്യൂം വീണ്ടും: വിജയക്കുതിപ്പ് തുടര്‍ന്ന് കേരള ബ്ലാസ്റ്റേഴ്‌സ്; മുംബൈക്കെതിരേ ജയം

തുടര്‍ച്ചയായ തിരിച്ചടികള്‍ക്കു ശേഷം കേരള ബ്ലാസ്റ്റേഴ്‌സ് വിജയ പാതയില്‍. മുംബൈ സിറ്റിക്കെതിരേ നടന്ന മത്സരത്തില്‍ കേരള ബ്ലാസ്റ്റേഴ്‌സിന് ജയം. ലീഗില്‍ തുടര്‍ച്ചയായ രണ്ടാം ജയമാണ് ബ്ലാസ്റ്റേഴ്‌സ് സ്വന്തമാക്കിയത്. 23ാം മിനുട്ടില്‍ സൂപ്പര്‍ താരം ഇയാന്‍ ഹ്യൂമിന്റെ ഗോളിലാണ് ബ്ലാസ്‌റ്റേഴ്‌സ് മുംബൈയെ കീഴടക്കിയത്.

പാതിവഴിയില്‍ ടീമില്‍ നിന്നും രാജിവെച്ച റെനെ മ്യൂലന്‍സ്റ്റീന് പകരക്കാരനായി വന്ന ഡേവിഡ് ജെയിംസ് കേരള ബ്ലാസ്റ്റേഴ്‌സിനെ വിജയപാതയിലെത്തിക്കുന്നതില്‍ നിര്‍ണായക പങ്കുവഹിച്ചു. തിരിച്ചടികളില്‍ പ്രതിസന്ധിയിലാക്കിയ ബ്ലാസ്റ്റേഴ്‌സിനെ വിജയ വഴിയിലെത്തിച്ചതില്‍ ഇയാന്‍ ഹ്യൂമും നിര്‍ണായക പങ്കുവഹിച്ചു.

ഡല്‍ഹിക്കെതിരേ ഹാട്രിക്ക് മികവോടെ ഫോമിലേക്ക് തിരിച്ചെത്തിയ കനേഡിയന്‍ താരമായ ഹ്യൂം മുംബൈക്കെതിരേയും ഫോം തുടര്‍ന്നു. 23ാം മിനുട്ടില്‍ പെക്കൂസണ്‍ നല്‍കിയ പാസില്‍ നിന്നാണ് ഹ്യൂം മുംബൈ വലകുലുക്കിയത്. ഇതോടെ പോയിന്റ് പട്ടികയില്‍ മുന്നേറാനും ബ്ലാസ്റ്റേഴ്‌സിന് സാധിച്ചു.

ഡല്‍ഹിക്കെതിരേ 3-1ന് ജയിച്ച ആത്മവിശ്വാസത്തിലിറങ്ങിയ കേരള ബ്ലാസ്റ്റേഴ്‌സ് തുടക്കത്തില്‍ തന്നെ മുംബൈ പ്രതിരോധത്തിന് നിരന്തരം തലവേദന സൃഷ്ടിച്ചു. ഇതിനിടയില്‍ ലഭിച്ച അവസരമാണ് പെക്കൂസണ്‍ ഹ്യൂമിലൂടെ ഗോളാക്കി മാറ്റിയത്.

കൊച്ചിയില്‍ നടന്ന അദ്യ പാദത്തില്‍ ഇരുടീമുകളും 1-1നു സമനില പാലിച്ചിരുന്നു. എന്നാല്‍ പുതിയ പരിശീലകന്‍ എത്തിയതോടെ കെട്ടിലും മട്ടിലും മാറ്റങ്ങളൊരുക്കിയ ബ്ലാസ്റ്റേഴ്സ് മുംബൈക്ക് കനത്ത വെല്ലുവിളി ഉയര്‍ത്തി. കേരള ബ്ലാസ്റ്റേഴ്‌സ് പുതിയ പരിശീലകന്‍ ഡേവിഡ് ജെയിംസിന്റെ കീഴില്‍ തോല്‍വി അറിയാതെ രണ്ടാം ജയമാണ് മുംബൈക്കെതിരേ സ്വന്തമാക്കിയത്.

ഇയാന്‍ ഹ്യൂമാണ് കേരള ബ്ലാസ്‌റ്റേഴ്‌സില്‍ പേടിക്കേണ്ട താരമെന്ന് അലക്‌സാന്ദ്രെ ഗുയിമറെസ് വ്യക്തമാക്കിയിരുന്നു. ഇത് സത്യമാകുന്ന പ്രകടനമാണ് ഹ്യൂം കാഴ്ചവെച്ചത്.