ആരാധകര്‍ കാത്തിരുന്ന അവേശപ്പോരില്‍ പ്രാദേശിക വീര്യം നാട്ടുപ്രമാണികളെ തുരത്തിയോടിച്ചു. അതും അവരുടെ തട്ടകത്തില്‍ വെച്ച്. സീസണിലെ ആദ്യ എല്‍ ക്ലാസിക്കോയില്‍ എതിരില്ലാത്ത മൂന്ന് ഗോളുകള്‍ക്ക് സാന്റിയാഗോ ബെര്‍ണാബുവില്‍ റയല്‍ മാഡ്രിഡിനെ കണ്ടം വഴി ഓടിച്ച ബാഴ്‌സലോണയെ രണ്ടു കയ്യും നീട്ടി സ്വീകരിച്ച സോഷ്യല്‍ മീഡിയ റൊണാല്‍ഡോയും കൂട്ടരെയും പൊങ്കാലയിട്ടു.
സുവാരസ്, മെസ്സി, അലെക്‌സി വിദാല്‍ എന്നിവരുടെ ഗോളുകള്‍ക്കാണ് ബാഴ്‌സലോണ റയല്‍ മാഡ്രിഡിനെ തോല്‍പ്പിച്ചത്. ജയത്തോടെ റയലുമായുള്ള പോയിന്റ് വ്യത്യാസം 14 ആക്കി ഉയര്‍ത്തിയ ബാഴ്‌സലോണ ക്രിസ്മസ് ക്രിസ്മസ് ന്യൂ ഇയര്‍ ആഘോഷത്തിന്റെ മാറ്റു കൂട്ടി. ബദ്ധ വൈരികളുടെ പോരില്‍ റയല്‍ മാഡ്രിഡിനേറ്റ നാണക്കേട് സോഷ്യല്‍ മീഡിയയില്‍ ട്രോളുകളുടെ കുത്തൊഴുക്കുണ്ടാക്കി.
ബാഴ്‌സയുമായി തോറ്റതോടെ ലാലീഗയിലെ റയലിന്റെ കിരീട മോഹങ്ങള്‍ ഏകദേശം അസ്തമിച്ചു. ക്ലബ്ബ് ലോകകപ്പ് നേടിയ വമ്പോടെ എത്തിയ റയല്‍ മാഡ്രിഡിന് മൂന്ന് ഗോളുകളിട്ട് ചുട്ടമറുപടിയാണ് മെസ്സിയും കൂട്ടരും നല്‍കിയത്.