ഇന്ത്യന്‍ സൂപ്പര്‍ ലീഗ് പത്താം സീസന്റെ ആദ്യ മത്സരം വീണ്ടും കൊച്ചിയില്‍ കലൂര്‍ ജവഹര്‍ലാല്‍ നെഹ്റു സ്റ്റേഡിയത്തില്‍ വച്ചു നടക്കും. ആദ്യ മത്സരത്തില്‍ കേരളാ ബ്ലാസ്റ്റേഴ്സ് ബെംഗളൂരു എഫ്സിയെ നേരിടും. മത്സരത്തിന് മുന്നോടിയായി നടന്ന പത്ര സമ്മേളനത്തില്‍ കേരളാ ബ്ലാസ്റ്റേഴ്സ് അസിസ്റ്റന്റ് പരിശീലകന്‍ ഫ്രാങ്ക് ഡാവെന്‍ ഈ സീസണിലെ പ്രതീക്ഷകളെ കുറിച്ച് പങ്കുവെച്ചു.
ആദ്യ മത്സരം എപ്പോഴും പ്രധാനമാണ്. അത് കഠിനമാണ്. കാരണം എതിര്‍ ടീം എങ്ങനെയാണ് കളിക്കുകയെന്ന് നമുക്കറിയില്ല. സാധാരണയായി സമാന പരിശീലകന്‍ തന്നെയാണ് ഉണ്ടാകാറ്. അത്തരം സാഹചര്യങ്ങളില്‍ ഞങ്ങള്‍ നന്നായി തയ്യാറെടുക്കും. ഞാന്‍ രണ്ടോ മൂന്നോ ആഴ്ച മുന്‍പ് മുതല്‍ എല്ലാ കളിക്കാരും ചേര്‍ന്ന് നന്നായി പരിശീലിക്കാറുണ്ട്. എന്നാല്‍ ഇത്തവണ ചില കളിക്കാര്‍ ദേശീയ ടീമിനായി പോയിരിക്കുന്നതിനാല്‍ അത് നടന്നില്ല. ചില പരിക്കേറ്റ താരങ്ങളുമുണ്ട്. കഴിഞ്ഞ ആഴ്ചകളില്‍ ഞങ്ങള്‍ ദുബായിയില്‍ ആയിരുന്നു. അവിടെ ഞങ്ങള്‍ നന്നായി തയ്യാറെടുത്തു. ടീം തയ്യാറാണ്- ഡാവെന്‍ പറഞ്ഞു.
വിവാദപരമായ അവസാനിച്ച കേരളാ ബ്ലാസ്റ്റേഴ്‌സിന്റെ ഒന്‍പതാം സീസണിലെ അവസാന മത്സരത്തെക്കുറിച്ചും ഫ്രാങ്ക് ഡാവെന്‍ ടീമിന്റെ നിലപാട് വ്യതമാക്കി. ‘കഴിഞ്ഞ സീസണില്‍ കഴിഞ്ഞതെല്ലാം അവിടെക്കഴിഞ്ഞു. ഇപ്പോള്‍ നമ്മള്‍ പുതിയ സീസണ്‍ ആരംഭിക്കുകയാണ്. പുതിയ മത്സരങ്ങള്‍. ഞങ്ങള്‍ പൂജ്യത്തില്‍ നിന്നാണ് ആരംഭിക്കുന്നത്.
ഞങ്ങള്‍ പുതിയ അനുഭവങ്ങളുമായാണ് ആരംഭിക്കുന്നത്. ബെംഗളൂരു വളരെ നല്ല ടീമാണ്. അവര്‍ കഴിഞ്ഞ സീസണില്‍ ഫൈനലില്‍ എത്തിയിരുന്നു. എന്നാല്‍ ഇപ്പോളിതാ പുതിയ സീസണ്‍ ആണ് ആരംഭിക്കുന്നത്. പുതിയ കഴിവുകള്‍, പുതിയ അവസരങ്ങള്‍- ഡാവെന്‍ പറഞ്ഞു.