കേരളാബ്‌ളാസ്‌റ്റേഴ്‌സിന്റെ പരാജയത്തില്‍ വിഷാദം പൂണ്ടിരിക്കുന്ന കേരളത്തിലെ ഫുട്‌ബോള്‍ പ്രേമികള്‍ക്ക് അല്‍പ്പം ആശ്വാസം പകര്‍ന്ന് ഗോകുലത്തിന്റെ മുന്നേറ്റം. ഇന്ന് നടന്ന ഐലീഗിലെ പോരാട്ടത്തില്‍ ട്രാവു എഫസിയെ രണ്ടിനെതിരേ മൂന്ന് ഗോളുകള്‍ക്ക് ഗോകുലം കീഴടക്കി. ഈ വിജയത്തോടെ പട്ടികയില്‍ ടീം ഒന്നാം സ്ഥാനത്തേക്ക് എത്തി.
പതിവ് പോലെ കളിയുടെ തുടക്കം മുതല്‍ ഗോളടിച്ച ഗോകുലത്തിനായി ജിതിനും ലൂക്ക മാജ്‌സണുമാണ് ഗോളുകള്‍ നേടിയത്. ഗോകുലത്തിന്റെ വിദേശതാരം സ്‌ളോവേനിയന്‍ ഇന്റര്‍നാഷണല്‍ ലൂക്ക മാജ്‌സണും ട്രാവുവിന്റെ ബ്രസീലിയന്‍ താരം ഫെര്‍ണാണ്ടീഞ്ഞോയും ഇരട്ടഗോളുകള്‍ നേടി. കളിയുടെ രണ്ടാം മിനിറ്റില്‍ ജിതിന്റെ ഗോളില്‍ മുന്നിലെത്തിയ ഗോകുലത്തെ ബ്രസീലിയന്‍ താരം ഫെര്‍ണാണ്ടീഞ്ഞോയുടെ ഗോളില്‍ ട്രാവു ഒപ്പം പിടിച്ചെങ്കിലും 19 ാം മിനിറ്റിലും 55 ാം മിനിറ്റിലും മാജ്‌സണ്‍ ലീഡ് നേടുകയായിരുന്നു. തൊട്ടടുത്ത മിനിറ്റില്‍ ഫെര്‍ണാണ്ടീഞ്ഞോയിലൂടെ ട്രാവു ഒരു ഗോള്‍ കൂടി നേടിയെങ്കിലും വിജയം നേടാനായില്ല.
ഈ വിജയത്തോടെ കളിച്ച അഞ്ചു മത്സരത്തിലും തോല്‍വി അറിയാതെ മുന്നേറുകയാണ് ഗോകുലം. അഞ്ചു കളികളില്‍ നാലിലും വിജയം നേടിയ അവര്‍ ഒരു മത്സരത്തില്‍ സമനിലയിലും കുരുങ്ങി. 13 പോയിന്റുമായി ഒന്നാമതാണ് ഗോകുലം. ഇതുവരെ 15 ഗോളുകള്‍ എതിരാളികളുടെ വലയില്‍ എത്തിച്ച അവര്‍ അഞ്ചു ഗോളുകളാണ് വഴങ്ങിയത്.