ഇന്ന് ലാലിഗയിൽ തകർപ്പൻ തിരിച്ച് വരവാണ് റയൽ മാഡ്രിഡ് നടത്തിയത്. എതിരില്ലാത്ത മൂന്ന് ഗോളുകൾക്കാണ് ലെഗാനസിനെ അവർ പരാജയപ്പെടുത്തിയത്. നാളുകൾ ഏറെയായി മോശമായ പ്രകടനമായിരുന്നു കിലിയൻ എംബപ്പേ നടത്തിയിരുന്നത്. എന്നാൽ ഇന്ന് മികച്ച പ്രകടനം നടത്തി, ടീമിന് വേണ്ടി ഒരു ഗോളും സ്വന്തമാക്കി. വിനിയുടെ അസിസ്റ്റിൽ നിന്നാണ് എംബപ്പേ ഗോൾ നേടിയത്. കൂടാതെ ഫെഡെ വാൽവെർദെ, ജൂഡ് ബെല്ലിങ്ങ്ഹാം എന്നിവരാണ് റയൽ മാഡ്രിഡിന് വേണ്ടി മറ്റു ഗോളുകൾ നേടിയ താരങ്ങൾ.
ലാലിഗയിൽ ഒന്നാം സ്ഥാനത്തുള്ള ബാഴ്സയെക്കാൾ ഒരു മത്സരം കുറച്ചു കളിച്ച റയൽ മാഡ്രിഡ് 4 പോയിന്റിനാണ് പുറകിൽ നിൽക്കുന്നത്. ബാഴ്സ സമനില വഴങ്ങിയതോടെ വിജയം എന്തായാലും നേടണമെന്ന് ഉറപ്പിച്ചുവെന്നും എംബപ്പേ പറഞ്ഞിട്ടുണ്ട്.
കിലിയൻ എംബപ്പേ പറയുന്നത് ഇങ്ങനെ:
“എനിക്ക് വിനീഷ്യസുമായി വളരെ നല്ല ബന്ധമാണ് ഉള്ളത്.റയൽ മാഡ്രിഡിൽ ഉള്ളവരെല്ലാം മികച്ച താരങ്ങളാണ്.ഞങ്ങൾ വിജയിക്കാൻ തയ്യാറായവരാണ്. എന്നെ അത്ഭുതപ്പെടുത്തിയ കാര്യം കാസ്റ്റില്ല താരങ്ങളുടെ ക്വാളിറ്റിയാണ്. അത് എനിക്ക് ഇതിനു മുൻപ് അറിയില്ലായിരുന്നു.
കിലിയൻ എംബപ്പേ തുടർന്നു:
“എപ്പോഴും വിജയമാണ് ഞങ്ങൾ ലക്ഷ്യം വെക്കാറുള്ളത്. ഇന്നലെ ബാഴ്സലോണ സമനില വഴങ്ങിയിരുന്നു. അതുകൊണ്ടുതന്നെ ഞങ്ങൾക്ക് ഇനി മത്സരത്തിൽ വിജയം മാത്രമായിരുന്നു വേണ്ടിയിരുന്നത്. മികച്ച പ്രകടനമാണ് ഞങ്ങൾ നടത്തിയത്. ഏത് പൊസിഷനിലും എനിക്ക് കളിക്കാൻ സാധിക്കും. ടീമിനെ സഹായിക്കുക, നല്ല രൂപത്തിൽ കളിക്കുക എന്നുള്ളത് മാത്രമാണ് എന്റെ ലക്ഷ്യം ” കിലിയൻ എംബപ്പേ പറഞ്ഞു.