ലോക ഫുട്ബോളിൽ ഏറ്റവുമധികം ആളുകൾ പിന്തുടരുന്നതും ഇഷ്ടപ്പെടുന്നതുമായ ലീഗ് ആണ് ഇംഗ്ലീഷ് പ്രീമിയർ ലീഗ്. ഇന്ത്യൻ ഫുട്ബോൾ ആരാധകരെ ആവേശത്തിലാക്കി കൊണ്ട് ഇന്ത്യൻ മണ്ണിലേക്ക് കടന്ന് വരുകയാണ് പ്രീമിയർ ലീഗ് ക്ലബ് മാഞ്ചസ്റ്റർ യുണൈറ്റഡ്. ലോകത്തിൽ തന്നെ ഏറ്റവും കൂടുതൽ ആരാധകരുള്ള ക്ലബ് ആണ് യുണൈറ്റഡ്. ആയത് കൊണ്ട് തന്നെ യുണൈറ്റഡിന്റെ എല്ലാ ഇന്ത്യൻ പദ്ധതികൾക്കും വലിയ പിന്തുണ കിട്ടാനുള്ള സാധ്യതയുണ്ട്. നിലവിൽ പുറത്ത് വരുന്ന വാർത്തകൾ അനുസരിച്ച് മാഞ്ചസ്റ്റർ യുണൈറ്റഡ് തമിഴ്നാട്ടിൽ ഒരു പരിശീലന കേന്ദ്രം സ്ഥാപിക്കുമെന്ന് പ്രതീക്ഷിക്കുന്നു.
2025ലെ വേൾഡ് ഇക്കണോമിക് ഫോറം വാർഷിക സമ്മേളനത്തിൽ ക്ലബ്ബിലെ ചില ഉന്നത ഉദ്യോഗസ്ഥർ തമിഴ്‌നാട് വ്യവസായവുമായി ദാവോസിൽ കൂടിക്കാഴ്ച നടത്തിയതായും ചെന്നൈയിൽ ഫുട്ബോൾ സെൻ്റർ സ്ഥാപിക്കുന്നതിനുള്ള സാധ്യതയെക്കുറിച്ച് ചർച്ച ചെയ്തതായും മാധ്യമങ്ങൾ റിപ്പോർട്ട് ചെയ്യുന്നു. വനിതാ ഫുട്ബോളിൽ വളരെയധികം ശ്രദ്ധ കേന്ദ്രീകരിച്ച് ആഗോള തലത്തിലുള്ള ഫുട്ബോൾ പരിശീലനം തമിഴ്നാട്ടിലേക്ക് കൊണ്ടുവരാൻ യുണൈറ്റഡ് ആഗ്രഹിക്കുന്നുവെന്നും വൃത്തങ്ങൾ അറിയിച്ചു.
ബെംഗളൂരുവിൽ റേഞ്ചേഴ്‌സ്, ഹൈദരാബാദിൽ ബൊറൂസിയ ഡോർട്ട്മുണ്ട്, പൂനെയിൽ ഫിയോറൻ്റീന, കൊൽക്കത്തയിൽ അത്‌ലറ്റിക്കോ മാഡ്രിഡ് എന്നിവയുൾപ്പെടെ ഇന്ത്യൻ ക്ലബ്ബുകളുമായി സഹകരിക്കുന്ന നിരവധി ഫുട്ബോൾ ക്ലബ്ബുകൾ ഇവിടെ ഉണ്ടായിട്ടുണ്ട്. എന്നാൽ, രാജ്യത്ത് ആദ്യമായാണ് ഒരു വലിയ ക്ലബ്ബ് പരിശീലന കേന്ദ്രം വഴി സഹകരിക്കാൻ തയ്യാറാവുന്നത്.
