ലോകകപ്പ് പ്രീക്വാര്‍ട്ടറില്‍ കാനറിപ്പടയോട് ദയനീയ തോല്‍വി ഏറ്റുവാങ്ങിയതിന് പിന്നാലെ പൗളോ ബെന്റോ ദക്ഷിണ കൊറിയന്‍ ടീമിന്റെ പരിശീലക സ്ഥാനം രാജിവെച്ചു. മാസങ്ങള്‍ക്ക് മുന്നെയെടുത്ത തീരുമാനമാണെന്നും ബ്രസീലിനോടേറ്റ തോല്‍വിയുമായി തീരുമാനത്തിന് ബന്ധമില്ലെന്നും പിന്നീട് ബെന്റോ പറഞ്ഞു.
ഭാവിയെ കുറിച്ച് ആലോചിക്കേണ്ട സമയമാണിത്. എന്നാല്‍, അതിനി കൊറിയന്‍ റിപ്പബ്ലിക്കിനൊപ്പമാകില്ല. നാലു വര്‍ഷത്തിലേറെ കാലം ആ ടീമിനെ പരിശീലിപ്പിക്കാനായതില്‍ അഭിമാനമുണ്ട്. ഇനി അല്‍പം വിശ്രമിക്കണം. ഭാവി കാര്യങ്ങള്‍ എന്നിട്ട് തീരുമാനിക്കണം.
ലോകകപ്പ് ചരിത്രത്തില്‍ മൂന്നാം തവണ നോക്കൗട്ട് കണ്ട ടീമിനൊപ്പമായതില്‍ സന്തോഷമുണ്ട്. വിജയം ബ്രസീല്‍ അര്‍ഹിച്ചതായിരുന്നു. എന്നാലും, മത്സരഫലം ഇങ്ങനെയായതില്‍ വേദനയുണ്ട്. നാലു വര്‍ഷത്തിനിടെ കൊറിയന്‍ ടീമിലുണ്ടായതെല്ലാം അസാധാരണമായിരുന്നു- മത്സര ശേഷം നടത്തിയ പടിയിറങ്ങല്‍ പ്രഖ്യാപനത്തില്‍ ബെന്റോ പറഞ്ഞു.
താരങ്ങളെയും പ്രസിഡന്റിനെയും തീരുമാനം അറിയിച്ചിട്ടുണ്ടെന്നും സെപ്റ്റംബറിലെടുത്ത തീരുമാനമാണെന്നും അദ്ദേഹം കൂട്ടിച്ചേര്‍ത്തു. 2002ല്‍ പോര്‍ച്ചുഗലിനുവേണ്ടി ലോകകപ്പ് കളിച്ച താരമാണ് ബെന്റോ.
ബ്രസീല്‍ ടീം സമ്പൂര്‍ണാധിപത്യം പുലര്‍ത്തിയ കളിയില്‍ 1-4നായിരുന്നു കൊറിയന്‍ ടീമിന്റെ തോല്‍വി. കളിയുടെ ആദ്യ പകുതിയില്‍ നാലു ഗോള്‍ വഴങ്ങി തോല്‍വി ഉറപ്പിച്ച ദക്ഷിണ കൊറിയ രണ്ടാം പകുതിയില്‍ ഒരു ആശ്വാസ ഗോള്‍ നേടി.