ആധികാരിക ജയത്തോടെ കേരളം സന്തോഷ് ട്രോഫി ഫുട്‌ബോളിന്റെ ഫൈനല്‍ റൗണ്ടില്‍ കടന്നു. കലൂര്‍ ജവഹര്‍ലാല്‍ നെഹ്‌റു അന്താരാഷ്ട്ര സ്റ്റേഡിയത്തില്‍ നടന്ന പ്രാഥമിക റൗണ്ടിലെ മൂന്നാം മത്സരത്തില്‍ പുതുച്ചേരിയെ ഒന്നിനെതിരെ നാല് ഗോളിന് തകര്‍ത്ത് കേരളത്തിന്റെ മുന്നേറ്റം. നേരത്തെ, ലക്ഷദ്വീപിനെയും ആന്‍ഡമാന്‍ നിക്കോബാറിനെയും കേരളം വലിയ മാര്‍ജിനില്‍ പരാജയപ്പെടുത്തിയിരുന്നു.
താരതമ്യേന ഭേദപ്പെട്ട എതിരാളികളായ പുതുച്ചേരിയെ കളിയുടെ സമസ്ത തലങ്ങളിലും പിന്തള്ളിയാണ് കേരളം ഫൈനല്‍ റൗണ്ടിലേക്ക് ടിക്കറ്റെടുത്ത്. ഇരു പകുതികളിലുമായാണ് കേരളത്തിന്റെ ഗോളുകള്‍ വന്നത്.
നിജോ ഗില്‍ബര്‍ട്ട് (21-ാം മിനിറ്റ്) പെനല്‍റ്റിയിലൂടെ കേരളത്തിന്റെ സ്‌കോറിംഗിന് തുടക്കമിട്ടു. അര്‍ജുന്‍ ജയരാജ്, നൗഫല്‍, ബുജൈര്‍ എന്നിവര്‍ കേരളത്തിന്റെ ഗോള്‍ പട്ടിക പൂര്‍ത്തിയാക്കി. ആന്‍സണിന്റെ വകയായിരുന്നു പുതുച്ചേരിയുടെ ഏക ഗോള്‍.