ലോകത്തിലെ എക്കാലത്തെയും മികച്ച ഫുട്ബോൾ താരങ്ങളാണ് ക്രിസ്റ്റ്യാനോ റൊണാൾഡോയും, ലയണൽ മെസിയും. രാജ്യത്തിനെയും ക്ലബിനെയും എന്നും മുൻപിലേക്ക് കൊണ്ട് വരുന്നതിൽ വിജയിച്ചിട്ടുള്ള താരങ്ങളാണ് ഇരുവരും. തങ്ങളുടെ അവസാന ഘട്ട ഫുട്ബോൾ യാത്രകൾ ആസ്വദിക്കുകയാണ് അവർ ഇപ്പോൾ. ഇരുവരും യൂറോപിയൻ ലീഗുകളിൽ നിന്ന് പടിയിറങ്ങിയെങ്കിലും തകർപ്പൻ ഫോമിലാണ് ഇപ്പോൾ ഉള്ളത്.
ക്രിസ്റ്റ്യാനോ റൊണാൾഡോയുടെ സുഹൃത്തും, മാഞ്ചസ്റ്റർ യുണൈറ്റഡ് താരമായ നെമജ്ഞ വിദിച്ച് ഇരു താരങ്ങളെ പരസ്പരം വ്യത്യസ്തമാക്കുന്ന കാര്യങ്ങൾ ഏതൊക്കെയാണ് എന്ന് പറഞ്ഞിരിക്കുകയാണ്. കൂടാതെ ഫുട്ബോൾ ചരിത്രത്തിലെ തന്നെ ഏറ്റവും മികച്ച താരങ്ങളിൽ ഒരാളാണ് റൊണാൾഡോ എന്നാണ് ഇദ്ദേഹം പറഞ്ഞിട്ടുള്ളത്.
നെമജ്ഞ വിദിച്ച് പറയുന്നത് ഇങ്ങനെ:
” എന്നെ സംബന്ധിച്ചിടത്തോളം ക്രിസ്റ്റ്യാനോ റൊണാൾഡോ ഫുട്ബോൾ ചരിത്രത്തിലെ ഏറ്റവും മികച്ച താരങ്ങളിൽ ഒരാളാണ്. അദ്ദേഹം നേടിയ ഗോളുകൾ അതിന് തെളിവാണ്. മാത്രമല്ല യൂറോപ്പിലെ ഏറ്റവും മികച്ച മൂന്ന് ലീഗുകളിൽ വർഷങ്ങളോളം അദ്ദേഹം ഹൈ ലെവലിൽ കളിച്ചു. മാത്രമല്ല ഈ ലീഗുകളിലെ ഏറ്റവും മികച്ച താരത്തിനുള്ള പുരസ്കാരം അദ്ദേഹം സ്വന്തമാക്കുകയും ചെയ്തു. മറ്റേത് താരത്തിനും അത് കഴിഞ്ഞിട്ടില്ല. ഓരോ ജനറേഷനും ഓരോ ഇതിഹാസങ്ങളുണ്ട്. പരിക്കുകൾ ഒന്നും പറ്റാതെ 20 വർഷത്തോളം 50ലധികം മത്സരങ്ങളാണ് മെസ്സിയും റൊണാൾഡോയും കളിച്ചിട്ടുള്ളത്”
നെമജ്ഞ വിദിച്ച് തുടർന്നു:
“പക്ഷേ ഇവിടത്തെ വ്യത്യാസം എന്തെന്നാൽ റൊണാൾഡോ വ്യത്യസ്തങ്ങളായ മൂന്നു ലീഗുകളിൽ കളിച്ചു എന്നതാണ്. അവിടെയൊക്കെ മികച്ചതാവാൻ അദ്ദേഹത്തിന് കഴിയുകയും ചെയ്തു. ലോകത്തെ ഏറ്റവും മികച്ച താരം ആവുക എന്നതാണ് റൊണാൾഡോയുടെ മെന്റാലിറ്റി. അത് അദ്ദേഹം മറച്ചുവെക്കാറില്ല. അദ്ദേഹം വളരെയധികം ഹാർഡ് വർക്ക് ചെയ്തു. ഇന്ന് അദ്ദേഹം നേടിയതെല്ലാം അദ്ദേഹം അർഹിക്കുന്നതാണ്. ഏതൊരു യുവ താരത്തിനും മാതൃകയാക്കാൻ പറ്റിയ താരമാണ് റൊണാൾഡോ. ആർക്ക് വേണമെങ്കിലും അദ്ദേഹത്തിന്റെ കാൽപ്പാടുകൾ പിന്തുടരാം ” നെമജ്ഞ വിദിച്ച് പറഞ്ഞു.