ലോകത്തിലെ ഏറ്റവും മികച്ച ഫുട്ബോൾ താരമാണ് അർജന്റീനൻ ഇതിഹാസമായ ലയണൽ മെസി. തന്റെ ഫുട്ബോൾ കരിയറിൽ മെസിക്ക് അവസാനത്തെ അഞ്ച് വർഷങ്ങൾ ഒരിക്കലും മറക്കാൻ സാധിക്കില്ല. ഈ കാലയളവിലാണ് മെസി തന്റെ സ്വപ്നസാക്ഷാത്കാരമായ നേട്ടങ്ങൾ എല്ലാം കൈവരിച്ചത്. ഇപ്പോൾ അദ്ദേഹം തന്റെ ഫുട്ബോൾ ജീവിതത്തിലെ അവസാന ഘട്ടത്തിലൂടെയാണ് കടന്നു പോകുന്നത്. നിലവിൽ യുവ താരങ്ങൾക്ക് മോശമായ സമയം കൊടുക്കുകയാണ് അദ്ദേഹം.
2026 ലോകകപ്പിൽ മെസി കളിക്കുമോ ഇല്ലയോ എന്ന കാര്യത്തിൽ താരം ഇത് വരെ ഉറപ്പ് പറഞ്ഞിട്ടില്ല. എന്തായാലും മെസി അടുത്ത ലോകകപ്പ് കളിക്കണം എന്നാണ് ആരാധകരുടെ ആവശ്യം. ലയണൽ മെസിയുടെ മുൻ സഹതാരവും സുഹൃത്തുമായ സെർജിയോ അഗ്വേറോ ഇക്കാര്യത്തെക്കുറിച്ച് സംസാരിച്ചിട്ടുണ്ട്.
സെർജിയോ അഗ്വേറോ പറയുന്നത് ഇങ്ങനെ:
”ലയണൽ മെസി അടുത്ത വേൾഡ് കപ്പിലും കളിക്കും എന്നാണ് ഞാൻ കരുതുന്നത്. തീർച്ചയായും അദ്ദേഹം ഫിറ്റ്നസിന്റെ കാര്യത്തിൽ ശ്രദ്ധ പുലർത്തും. പക്ഷേ പഴയ മെസിയാവില്ല അദ്ദേഹം. പഴയപോലെ കളിക്കാൻ കഴിഞ്ഞു എന്ന് വരില്ല. എന്നിരുന്നാൽ പോലും ഫ്രീകിക്കുകൾ കൊണ്ടും അസിസ്റ്റുകൾ കൊണ്ടും ടീമിനെ സഹായിക്കാൻ മെസിക്ക് കഴിഞ്ഞേക്കും. ശാരീരികമായി അതിന് തയ്യാറെടുക്കുക എന്നതാണ് അദ്ദേഹം ചെയ്യേണ്ടത്. മെസി ആഗ്രഹിക്കുന്നുണ്ടെങ്കിൽ തീർച്ചയായും മെസ്സിക്ക് അതിന് സാധിക്കും ” സെർജിയോ അഗ്വേറോ പറഞ്ഞു.
നിലവിൽ അമേരിക്കൻ ലീഗിൽ തകർപ്പൻ പ്രകടനം നടത്തുന്നുണ്ടെങ്കിലും ഇന്ന് നടന്ന മത്സരത്തിൽ അറ്റ്ലാന്റ യൂണൈറ്റഡിനോട് രണ്ടിനെതിരെ മൂന്നു ഗോളുകൾക്ക് ഇന്റർ മിയാമി പരാജയപ്പെട്ടിരുന്നു. ഇതോടെ ക്ലബ് പുറത്തായിരിക്കുകയാണ്. ടൂർണമെന്റിൽ ഉടനീളം 19 മത്സരങ്ങൾ കളിച്ച മെസി 20 ഗോളുകളും 10 അസിസ്റ്റുകളും നേടിയിട്ടുണ്ട്.