മാഞ്ചസ്റ്റർ യുണൈറ്റഡ് ലെജൻഡ് ഒലെ ഗുണാർ സോൾഷെറിനെ പിരിച്ചുവിട്ടതിന് ശേഷം താത്കാലിക മാനേജരായി നിയമിക്കപ്പെട്ട ജർമൻ കോച്ചും കളിക്കാരനുമായ റാൽഫ് റാഗ്നിക്ക് അത്ര നല്ല നിലയിലല്ല ക്ലബ്ബിൽ നിന്ന് പടിയിറങ്ങിയത്. മോഡേൺ ഫുട്ബോളിന്റെ ഗോഡ്ഫാദർ എന്നറിയപ്പെട്ട റാഗ്നിക്ക് 2021 നവംബറിലാണ് യുണൈറ്റഡിലേക്ക് ജോയിൻ ചെയ്തത്. എന്നാൽ ആ സമയത്ത് മാഞ്ചസ്റ്റർ യൂണൈറ്റഡിലെ മൊത്തം ഘടനയുടെ തകർച്ച കാരണം റാഗ്‌നിക്കിന് അവിടെ ശോഭിക്കാൻ കഴിഞ്ഞില്ല.
മാഞ്ചസ്റ്റർ യുണൈറ്റഡിൽ 29 മത്സരങ്ങളുടെ ചുമതലയുണ്ടായിരുന്ന റാഗ്‌നിക്കിന് കീഴിൽ 11 വിജയങ്ങളും 9 തോൽവിയും 9 സമനിലയുമാണ് ടീം വഴങ്ങിയത്. യുണൈറ്റഡിൽ കളിക്കാരുടെ പിന്തുണ പോലും റാഗ്‌നിക്കിന് ഉണ്ടായിരുന്നില്ല. സൂപ്പർ താരം റൊണാൾഡോ പറഞ്ഞത്: ” ഒരു കോച്ചുപോലും അല്ലാത്ത ഒരാൾ എങ്ങനെയാണ് യുണൈറ്റഡിന്റെ ബോസ് ആവുക എന്നാണ്”. 63കാരനായ റാഗ്നിക്ക് നവംബർ 2024 വരെയാണ് കോൺട്രാക്ട് ഉണ്ടായിരുന്നത്. ആറ് മാസം താത്കാലിക കോച്ചായും അതിന് ശേഷം രണ്ട് വർഷം കൺസൾട്ടൻസി റോളിലേക്കുമാണ് റാഗ്നിക്കിനെ നിയമിച്ചത്. എന്നാൽ ആറ് മാസത്തെ ക്ലബ്ബിന്റെ മോശം പ്രകടനം മോശമായതിനാൽ ആരാധകരുടെയും ക്ലബ് ലെജൻഡ്‌സിന്റെയും വിമർശനങ്ങൾ ഏറ്റുവാങ്ങി പരസ്പര ധാരണയിൽ ക്ലബ്ബിൽ നിന്നും പിരിഞ്ഞു.
പിന്നീട് ഓസ്ട്രിയ നാഷണൽ ടീമിന്റെ ഉത്തരവാദിത്വവും ഏറ്റെടുത്ത റാൽഫ് നല്ല നിലയിലാണ് ടീമിനെ സംയോജിപ്പിച്ചു മുന്നോട്ട് പോകുന്നത്. അതിനിടയിൽ ജർമൻ വമ്പന്മാരായ ബയേൺ മ്യൂണിക്ക് അവരുടെ ചരിത്രത്തിലെ തന്നെ ഏറ്റവും നിരാശാജനകമായ സീസൺ ഒടുവിൽ അവരുടെ കോച്ചായ തോമസ് ട്യുചേലിനെ പിരിച്ചു വിട്ടതിന് ശേഷം റാൽഫിനെ അങ്ങോട്ട് ക്ഷണിക്കുകയായിരുന്നു. എന്നാൽ ജർമനിയിലേക്ക് പോകാനുള്ള ബയേണിന്റെ ക്ഷണം നിരസിച്ച റാൽഫ് ഓസ്ട്രിയ നാഷണൽ ടീമിന്റെ കൂടെ തന്നെ തുടരാൻ തീരുമാനിക്കുകയായിരുന്നു.
നിലവിൽ യൂറോയിൽ മത്സരിച്ചു കൊണ്ടിരിക്കുന്ന ഓസ്ട്രിയ മികച്ച പ്രകടനമാണ് ടൂർണമെന്റിൽ ഇതുവരെ കാഴ്ചവെച്ചു കൊണ്ടിരിക്കുന്നത്. കരുത്തന്മാരായ ഫ്രാൻസ്,നെതർലൻഡ്‌സ്‌,പോളണ്ട് എന്നിവരടങ്ങുന്ന മരണ ഗ്രൂപ്പിൽ പെട്ടിട്ടും മൂന്ന് കളികളിൽ നിന്ന് രണ്ട് വിജയങ്ങൾ നേടി ഒന്നാമതാണ് ഫിനിഷ് ചെയ്തത്. 1978 വേൾഡ് കപ്പിന് ശേഷം ഒരു ടൂർണമെന്റിൽ ഏറ്റവും കൂടുതൽ ഗോളുകൾ നേടുന്ന സീസൺ കൂടിയാണിത്.