ഞായറാഴ്ച ന്യൂഡൽഹിയിൽ രണ്ട് ചുവപ്പ് കാർഡുകൾ ലഭിച്ചതിന് ശേഷം പഞ്ചാബ് എഫ്‌സിയെ 1-0 ന് തോൽപ്പിച്ച് കേരള ബ്ലാസ്റ്റേഴ്സ് ഐഎസ്എൽ സീസണിലെ ഏറ്റവും മികച്ച പ്രതിരോധ പ്രകടനങ്ങളിലൊന്ന് സൃഷ്ടിച്ചു. മുഖ്യപരിശീലകൻ മൈക്കൽ സ്റ്റാഹ്റെയെ പുറത്താക്കിയതിന് ശേഷം അവസാന മൂന്ന് മത്സരങ്ങളിൽ രണ്ടെണ്ണം വിജയിച്ച ബ്ലാസ്റ്റേഴ്സിന് 44-ാം മിനിറ്റിൽ നോഹ സദൗയിയുടെ പെനാൽറ്റി ഗോളിലൂടെയാണ് ലീഡ് ലഭിച്ചത്.
58-ാം മിനിറ്റിൽ സെൻ്റർ ബാക്ക് മിലോസ് ഡ്രിൻസിച്ചിന് രണ്ടാം മഞ്ഞക്കാർഡ് ലഭിച്ചു പുറത്തേക്ക് പോവുകയും 74-ാം മിനിറ്റിൽ ഐബാൻ ദോഹ്‌ലിംഗിന് ചുവപ്പ് ലഭിക്കുകയും ചെയ്തതോടെ ഇടക്കാല കോച്ച് ടിജി പുരുഷോത്തമന് തൻ്റെ ടീമിന്റെ ഡിഫെൻസിവ് മികവ് പുറത്തെടുക്കാനുള്ള സമയമായിരുന്നു. ഒരു ഗോൾ ലീഡിൽ നിൽക്കുന്ന ബ്ലാസ്റ്റേഴ്സ് പിന്നെ ബസ് പാർക്ക് ചെയ്ത് കളിക്കാൻ ആരംഭിച്ചു. എന്നാൽ അവർ അത് കൃത്യതയോടെ ചെയ്തു. പ്രതിരോധത്തിലെ സ്ഥിരതയ്ക്കായി സദൗയിയെ ബലിയാടാക്കി സബ് വലിക്കാൻ പോലും കോച്ച് മടിച്ചില്ല. അത് മൊറോക്കൻ താരത്തെ അലോസരപ്പെടുത്തിയെങ്കിലും, സ്മാർട് മാൻ മാനേജ്‌മെൻ്റിൻ്റെ ക്രെഡിറ്റ് ബ്ലാസ്റ്റേഴ്‌സിനാണ്.
ബ്ലാസ്റ്റേഴ്സ് ഗോൾകീപ്പർ സച്ചിൻ സുരേഷിനെ സംബന്ധിച്ചിടത്തോളം അവസാന 15 മിനിറ്റുകൾ തൻ്റെ സീസണിലെ ഏറ്റവും വെല്ലുവിളി നിറഞ്ഞ ഘട്ടമായിരുന്നു. മാരകമായ പിഴവുകളുടെ ഒരു പരമ്പരയ്ക്ക് ശേഷം, തൻ്റെ വിലയേറിയ പോയിൻ്റുകൾ നഷ്ടപ്പെടുത്തുന്ന, യുവ തൃശൂർ കസ്റ്റോഡിയന് തൻ്റെ ഗുണങ്ങളെക്കുറിച്ച് ആരാധകരെ ബോധ്യപ്പെടുത്താനുള്ള മികച്ച അവസരം ലഭിച്ചു. കൂടാതെ രണ്ട് സേവുകൾ ഉൾപ്പെടുന്ന വളരെ മെച്ചപ്പെട്ട ഡിസ്പ്ലേയിലൂടെ അദ്ദേഹം അത് പൂർത്തീകരിക്കുകയും ചെയ്തു.
15 മത്സരങ്ങളിൽ നിന്ന് 17 പോയിൻ്റുമായി ബ്ലാസ്റ്റേഴ്സ് ഒമ്പതാം സ്ഥാനത്തെത്തി. ജനുവരി 13ന് കൊച്ചിയിൽ ഒഡീഷ എഫ്‌സിയുമായാണ് അവരുടെ അടുത്ത മത്സരം