ജിദ്ദയിലെ കിങ് അബ്ദുള്ള സ്പോര്ട്സ് സ്‌റ്റേഡിയത്തില്‍ ഇന്നലെ നടന്ന ആവേശകരമായ മത്സരത്തിൽ റയൽ മാഡ്രിഡിനെ തകർത്ത് ബാർസിലോണ സൂപ്പർ കപ്പ് ചാമ്പ്യന്മാരായി. എൽ ക്ലാസിക്കോ പോരാട്ടത്തിൽ റയലിനെ രണ്ടിനെതിരെ അഞ്ച് ഗോളുകൾക്കാണ് ബാഴ്‌സിലോണ പരാജയപ്പെടുത്തിയത്.
ഇരു ടീമുകളും ഇഞ്ചോടിഞ്ച് പോരാട്ടമായിരുന്നു കാഴ്ച വെച്ചത്. 52 ശതമാനവും പൊസഷൻ ബാഴ്‌സയുടെ കൈകളിലായിരുന്നു. മത്സരത്തിന്റെ ആദ്യ പകുതിൽ തന്നെ ബാഴ്‌സിലോണ 4 ഗോളുകളും വലയിൽ കയറ്റിയിരുന്നു. ബാഴ്‌സയ്ക്ക് വേണ്ടി ലാമിന് യമാൽ, റോബര്‍ട്ട് ലെവന്‍ഡോവ്സ്‌കി, റാഫീഞ്ഞ, അലെജാന്‍ഡ്രോ ബാല്‍ഡേ എന്നിവർ ആദ്യ പകുതിയിൽ ഗോൾ കണ്ടെത്തി. റയലിന് വേണ്ടി ആദ്യം ഗോൾ നേടി ലീഡ് എടുത്തത് കിലിയന്‍ എംബാപ്പെയാണ്.
രണ്ടാം പകുതിയിൽ റയൽ മികച്ച മുന്നേറ്റത്തിന് ശ്രമിച്ചെങ്കിലും ബാഴ്‌സയുടെ ഡിഫൻസുകൾ അതിനെല്ലാം തടയിടുകയായിരുന്നു. 48 ആം മിനിറ്റിൽ റാഫിഞ്ഞ വീണ്ടും ഗോൾ നേടി. തുടർന്ന് റയൽ 60-ാം മിനിറ്റിൽ തന്നെ റോഡ്രിഗോയിലൂടെ ഒരു ഗോൾ തിരിച്ചടിച്ചു. എന്നാല്‍ ഇതിന് ശേഷം കൂടുതല്‍ കരുതലോടെ കളിച്ച ബാഴ്‌സലോണ റയലിന് തിരിച്ചുവരാന്‍ ഒരവസരവും നല്‍കാതെ പിടിച്ചുനിന്നു. ഇതോടെ ബാഴ്‌സ തങ്ങളുടെ 15 ആം സ്പാനിഷ് സൂപ്പർ കപ്പ് കിരീടം സ്വന്തമാക്കി.